Sulmuesi i Bayer Leverkusenit, Patrik Schick ka folur në lidhje me transferimin e Granit Xhakës te skuadra e Sunderlandit.
Në një intervistë për “Sky Germany”, Schick ka pranuar se humbja e Granit Xhakës është e madhe për Leverkusenin dhe më e rëndësishme se largimi i mesfushorit Florian Ëirtz.
Xhaka, të mërkurën u zyrtarizua te Sunderlandi, ekip me të cilin firmosi kontratë deri në vitin 2028 kurse Leverkuseni përfitoi 20 milionë euro nga shitja e tij.
Largimi i Xhakës nga klubi gjerman, ka bërë që sulmuesi Schick të jetë i shqetësuar për mungesën e tij në mesfushën e Leverkusenit për sezonin e ri.
“Nuk mund ta zëvendësojmë Florian Ëirtzin, por Granit Xhaka ishte lojtari më i rëndësishëm për të gjithë ekipin, dhe tani është larguar edhe ai. Xhaka ishte një lider, një lojtar me përvojë dhe tepër i rëndësishëm për Leverkusenin. Shumë gjëra funksionuan mirë me të dhe mendoj se largimi i tij është humbja më e madhe për ekipin”, është shprehur Schick.
Xhaka 32-vjeçar luajti për dy sezone tek Leverkuseni, ekip me të cilin fitoi titullin e kampionit, kupën dhe Superkupën e Gjermanisë.
