Një vizitë që e bëri të premten paradite, e ka bindur kryemjeshtrin Driton Kuka të marr vendimin që për kohë të gjatë po e mendonte.
Salla e xhudos e klubit Ippon, e ndërtuar tri dekada më parë, do të shndërrohet në muze. Është shtëpia e kampioneve olimpike, Majlinda Kelmendit, Nora Gjakovës e Distria Krasniqit, por edhe e kampionëve si Akil Gjakova, Laura Fazliu dhe shumë e shumë xhudistëve të tjerë.
Tani xhudistët e kryemjeshtrit Kuka ushtrojnë në sallën e Qendrës Nacionale të Xhudos, që ngadalë po kompletohet me objekte përcjellëse. Qendra Nacionale është dhjetëra metra larg sallës ikonike të klubit Ippon, në lagjen Asllan Çeshme në Pejë. Kjo sallë është e ndërtuar nga Driton Kuka me vëllezërit e tij, Sylën e Agronin, në pronë familjare.
Aty nisi rritja e ekipit të Kosovës në xhudo, falë punës së madhe të kryemjeshtrit dhe xhudistëve të tij.
Pas ndërtimit të sallës së Qendrës Nacionale, salla e vogël është shfrytëzuar më pak, kryesisht për punë me të rinj. Dy javë më parë salla u mbyll për renovim, por kryemjeshtri ka vendosur që ajo gradualisht të shndërrohet në muze të xhudos kosovare.
Kuka të premten paradite e vizitoi sallën dhe vendosi për idenë që po e shqyrtonte për një kohë.
“Këto ditët e fundit kam marr një vendim jo të lehtë! Ky vend do shndërrohet në muze e do e bajmë ngadalë e me kujdes së bashku me Agronin e Sylen që e ndërtuam për dashuri ndaj sportit tonë që aq shumë solli emocion për popullin Shqiptar pas luftës! Po më mungojnë stërvitjet në ketë palestër do më mungojnë krejt jetën por do e ilustrojmë me foto,video e kujtime këtë vend që do mbetet si një histori e bukur për vendin tim”, ka shkruar Driton Kuka në Facebook.
