Ermal Sadiku nga Lidhja Demokratike e Kosovës (LDK) ka vlerësuar se do të jetë e vështirë që subjekti i tij politik ta sfidojë Lëvizjen Vetëvendosje në zgjedhjet e parakohshme parlamentare, të cilat pritet të mbahen më 7 qershor.
Në emisionin “Mesditë” në Tëvë1, Sadiku ka theksuar se nuk synon të ndikojë opinionin publik përmes, siç i quajti ai, “populizmave”, por do të vazhdojë të paraqesë realitetin sipas tij.
“Normal që do të jetë e vështirë të sfidohet Lëvizja Vetëvendosje nga LDK-ja. Unë vazhdimisht do të jem stoik në atë që duhet të them të vërtetën. Nuk mund të dal dhe ta manipuloj opinionin me populizma. Duhet t’i tregojmë qytetarit atë që po e sheh, se jeta është shtrenjtuar, qeraja është rritur, kemi probleme elementare, shëndetësia është keq, arsimi është më i dobëti,” është shprehur ai.
Ai ka shtuar se nuk është e drejtë që, sipas tij, qeveria të kthehet vazhdimisht te e kaluara për të justifikuar problemet aktuale.
“Ata vazhdojnë të thonë se ka qenë më keq në vitin 2005, por ti je në qeveri prej pesë vitesh dhe nuk mund të kthehen për çdo problem që kanë sot, duke u viktimizuar për diçka që ka ndodhur në vitin 2005”, ka deklaruar ai.
