Mbi supet e tij rëndojnë dy aktakuza.
Ish presidenti Hashim Thaçi, betejën e parë në Gjykatën Speciale e nisi për akuzat për krime lufte.
Nga kjo akuzë, derivoi një rast tjetër penal.
Prokuroria e Specializuar pretendon se Thaçi pengoi drejtësinë dhe ndërhyri në dëshmitarë.
Për këtë çështje, së fundi Thaçi ka ofruar dorëzani prej 50 mijë eurosh, në këmbim të gjykimit në liri.
Mirëpo, qëndrimi në paraburgim vlerësohet se është në varësi të zhvillimeve tek dy rastet.
“Nuk besoj që Gjykata do të marrë vendim tani, sepse është e parakohshme domethënë vendimi përderisa është duke qëndru në paraburgim për një çështje tjetër. Kur të përfundon paraburgimi për çështjen tjetër, në rast se nuk dënohen, sepse nëse dënohen ata do të shkojnë automatikisht në vuajtje të dënimit, në rast se nuk dënohen atëherë Gjykata është brenda kompetencës kohore që ta shqyrtojë propozimin për dorëzaninë në vlerë 50 mijë euro”, u shpreh Bytyqi.
Kohën se kur do të mund të ketë një vendim lidhur me këtë propozim, nuk e treguan as nga Dhomat e Specializuara të Kosovës.
“Trupi Gjykues do të nxjerrë një vendim lidhur me këtë kërkesë në kohën e duhur”, ka njoftuar Dhomat e Specializuara të Kosovës.
Rrjedhimisht, konsiderohet se Gjykata Speciale do duhej të vepronte sikurse me të akuzuarit e tjerë sa i përket dorëzanive.
“Mendoj se zoti Thaçi do të lirohet nga paraburgimi pavarësisht epilogut të këtij rasti për pengim të drejtësisë. Se edhe ashtu zoti Thaçi ka kaluar pothuajse gjashtë vite që është nën masën e paraburgimit dhe arsye e vetme pse ai mbahet në paraburgim, për bindjen time është sepse ai po akuzohet për një çështje penale që ndërlidhet me krimet e luftës. Ndërsa për rastin e pengimit të drejtësisë, Gjykata mund të veprojë siç ka vepruar me të akuzuarit e tjerë, të cilët i ka liruar me masa alternative”, ka thënë Jashari.
Lirim me kusht me dorëzani nga Gjykata Speciale iu aprova Bashkim Smakaj në vlerë 50 mijë euro dhe Fadil Fazliut në vlerë 40 mijë euro.
