Sekretari i Përgjithshëm i NATO-s, Mark Rutte, paralajmëroi se Rusia është bërë “gjithnjë e më e pamatur”, duke theksuar rritjen e rreziqeve që, sipas tij, lidhen me aktivitetet ruse përgjatë krahut lindor të Aleancës.
Rutte tha se NATO ka vërejtur një shtim të numrit të dronëve dhe raketave që kalojnë në hapësirën ajrore të vendeve anëtare, duke krijuar rreziqe në rritje për sigurinë.
“Kemi parë më shumë dronë dhe raketa që kalojnë në hapësirën tonë ajrore përgjatë krahut tonë lindor, duke krijuar rrezik në rritje. Gjithashtu kemi parë një rritje të aktiviteteve keqdashëse që synojnë drejtpërdrejt territorin tonë, qoftë zjarrvënie në fabrikat që prodhojnë pajisje mbrojtëse për Ukrainën, apo sulmin hibrid rus në Leipzig,” tha ai, sipas Guardian.
Në këtë kuadër, kreu i NATO-s shprehu solidaritetin e Aleancës me Gjermaninë, duke theksuar se kërcënimet ndaj vendeve anëtare kërkojnë një përgjigje të përbashkët.
Ai tha se “rreziku që paraqet Rusia është i qartë”, ndërsa nënvizoi se NATO “punon pa ndërprerje për të mbajtur njerëzit tanë të sigurt”.
Rutte theksoi gjithashtu se përpjekjet për të dobësuar unitetin e vendeve anëtare ose për të ndikuar në mbështetjen e tyre për Ukrainën nuk do të kenë sukses.
“ Nëse Rusia mendon se do të përçahemi nga kërcënimet, ose nëse mendojnë se do të na dekurajojnë të mbështesim Ukrainën, gabohen. Uniteti ynë është i patundur.”
