“I kemi skemat e Kosovës”, kështu e nis shkrimin gazeta rumune “Sporturilor” teksa ka shfaqur fotot e përzgjedhësit Franco Foda në stërvitje duke mbajtur letrat në të cilat shihen planet e tij. Ndoshta pakujdesi nga 58-vjeçari austriak apo gjithçka mund të jetë e qëllimshme.
Stërvitja e Kosovës e mbajtur dje në “Fadil Vokrri” ishte e hapur në 15 minutat e para për mediat. Dhe kjo është shfrytëzuar nga fotografi i gazetës rumune, i cili ka arritur të kapë “skemat” të cilat synon t’i aplikojë Foda te Kosova.
Fotot, siç shkruan “Sporturilor”, tregojnë mënyrën se si Foda do të punojë në stërvitje, vendosjen e lojtarëve dhe strategjinë në goditjet standarde.
Kosova dhe Rumania luajnë sot nga ora 20:45 në “Fadil Vokrrin” e stërmbushur. Është ndeshja e parë e këtij edicioni të Ligës së Kombeve, Liga C. Pas tre ditëve, “Dardanët” udhëtojnë në Qipro. Në grup është edhe Lituania.
