Prodekanja për mësimdhënie dhe çështje të studentëve në Fakultetin e Bujqësisë dhe Veterinarisë në UP, Alltane Kryeziu, në javën e parë të këtij muaji ka dhënë dorëheqje nga pozita e saj. Në letër-dorëheqjen që tëvë1 e ka siguruar ajo ka listuar dy arsyet kryesore.
Madje në një prononcim dhënë për tëvë1, profesoresha Kryeziu thotë se ka dhënë dorëheqje për arsye parimore.
“Pozitat të cilat nuk kanë pasur nevojë të hapen për thirrjen e profesorit asistent nuk kanë qenë të nevojshme për programin mjekësi veterinare që janë hapur dy pozita, për shkak se janë më shumë se 12 profesor në atë program të studimeve e të cilët rrezikojnë me plotësim të normës”, tha Kryeziu.
Programi i nivelit master “Shkenca e Ushqimit” rrezikon akreditimin, kjo pasi sipas Kryeziut për këtë drejtim janë hapur konkurset për pranimin e profesorëve që nuk kanë të bëjnë me fushën në fjalë.
“Pozitat që ka pasur nevojë Fakulteti i Bujqësisë, sipas vendimit të rektorit që i ka shpërndarë, kanë qenë të nevojshme për “Shkencat e Ushqimit”, ku bartës mund të jenë profesorët ose profesionistët të cilët janë të fushës ose të Shkencave të Ushqimit. Ndërsa në pozitat e shpallura në konkursin e Universitetit të Prishtinës nuk figuron asnjë pozitë që lidhet me Shkencat e Ushqimit”, shtoi ajo.
Profesoresha Kryeziu tutje thotë se U.D i Sekretarit të Përgjithshëm të UP-së, i kishte kërkuar senatorëve me anë të një e-mail, që deri më 3 maj t’i bëjnë korrigjimet e nevojshme në konkurse.
Pikërisht për këtë, Kryeziu, fajëson dekanin e Fakultetit të Bujqësisë, Bedri Dragusha, që sipas saj nuk e ka paraqitur kërkesën e sekretarit për korrigjim të konkursit.
Për këto pretendime të tanimë ish-prodekanes, tëvë1 ka dërguar pyetje edhe te dekani Dragusha dhe te rektori Naser Sahiti, por që ende nuk kemi marrë ndonjë përgjigje.
Raporti i gazetarit Valmir Gallopeni.
