Viktimat e dhunës në familje gjejnë strehim për më shumë se gjashtë muaj në qendrat e strehimit në Kosovë.
Por, pas gjashtë muajve, duke mos pasur një zgjidhje tjetër, ndodh që viktimat të rikthehen tek dhunuesit.
Që kjo të parandalohet, Komuna e Prishtinës ka iniciuar marrjen e një vendimi për përkrahje financiare të këtyre viktimave deri në dy vite, me nga 500 euro për person.
Adelinë Sahiti, drejtoreshë e Mirëqenies Sociale shpreh se për këtë janë paraparë disa komponentë se si do t’u ofrohet ndihma.
“Janë tre komponenta është subvencionimi i qirasë prej 250 për një grua dhe familjen e saj, subvencionimi për kushtet e jeteses që shkon deri në 250 euro, pra në total është një pako prej 500 euro në muaj për një grua, kjo do të shkoj deri në dy vitë maksimumi”, tha ajo.
Por, ky proces shihet të jetë zgjatur për disa arsye.
“Është një vendim që ne me shumë zell dhe përkushtim që në marrje të mandatit e kemi shty si proces para ku na është dashur më shumë kohë që të analizojme si proces dhe se si të qasemi si ndihmesë…”, theksoi Sahiti.
Tutje, ajo thotë se numri i këtyre viktimave është i lartë.
“Mesatarisht në komunën e Prishtinës ka rreth 300 raste të raportuara të dhunës në familjë, është një numër kogja i lartë nuk do të arrijmë të I plotësojmë të gjitha nevojat dhe kërkesat por do ta nisim, sepse ne jemi me ta dhe për ta”, deklaroi Sahiti.
Ndryshe, Sahiti thotë se kjo nismë, pritet të konkretizohet me vendim nga Kuvendi Komunal më datën 24 nëntor.
Kronika e realizuar nga Lendrina Kodrolli.