Kapiteni i Kosovës, Amir Rrahmani duket se tashmë ka vendosur se ku do ta përfundojë karrierën si futbollist aktiv.
Rrahmani pritet ta mbyllë karrierën me fanellën e Napolit, pasi është pajtuar ta rinovojë kontratën, e cila do t’i skadojë kur të mbushë 35 vjet.
Me rinovimin e kontratës aktuale që në vitin e ardhshëm, Rrahmani do të mbetet te skuadra e Napolit deri në verën e vitit 2029.
31-vjeçari, tashmë është shndërruar në lider të mbrojtjes te Napoli, ekip me të cilin ka fituar dy tituj kampioni të Italisë.
Ai është pjesë e Napolit prej vitit 2020 kur iu bashkua nga Verona, ndërsa këtë sezon ka shënuar 1 gol në 19 paraqitje në të gjitha garat.
Gjithashtu, Rrahmani është rikuperuar nga lëndimi që e detyroi të mungojë në katër ndeshjet e fundit të Napoli dhe do të jetë startues në ndeshjen kampionale kundër Genoas, që zhvillohet këtë vikend.
