Cristiano Ronaldo po i luan muajt e tij të fundit me fanellën e ekipit Al-Nassr. Në fakt, ylli portugez këtë verë do të largohet nga Arabia Saudite për t’u rikthyer në Evropë.
Kështu, kanë njoftuar mediumet saudite, të cilat insistojnë se Ronaldo tashmë ka njoftuar drejtuesit e Al-Nassr për vendimin e tij. Ronaldo nuk ka pasur paraqitje të mira këtë edicion dhe vazhdimisht po kritikohet nga mediumet, gjë që ka ndikuar në vendimin e tij për t’u larguar nga Lindja e Mesme.
39-vjeçari ka kontratë deri në verën e vitit të ardhshëm me ekipin saudit, të cilën ka kërkuar ta shkëpus para kohe për t’u kthyer në futbollin evropian.
Në Evropë, ai do të rikthehet në Portugali te skuadra e Sportingut të Lisbonës me të cilën e ka nisur edhe karrierën si profesionist përpara se të largohej në vitin 2003.
Ronaldo në janar të vitit 2023 iu bashkua ekipit Al-Nassr si lojtar i lirë dhe firmosi kontratë për dy vjet e gjysmë në vlerë prej 200 milionë eurosh. Me ekipin saudit, Ronaldo nuk e ka fituar asnjë trofe kurse këtë edicion ka shënuar 36 gola në 37 paraqitje, ndërsa ka bërë edhe 12 asistime.
Gjatë karrierës së tij, Ronaldo ka luajtur edhe për Manchester Unitedin, Real Madridin e Juventusin.
