Ministri rus i Financave, Anton Siluanov, bëri një paraqitje surprizë në bisedimet financiare të G20-ës, të organizuara nga Shtetet e Bashkuara në Asheville, Karolinën e Veriut, duke shkaktuar zhgënjim dhe pakënaqësi te zyrtarët evropianë.
Paraqitja e tij të hënën shënon herën e parë që Siluanov, ministër që prej vitit 2011, merr pjesë personalisht në një takim të G20 që nga pushtimi i plotë i Ukrainës nga Rusia në vitin 2022.
Siluanov zhvilloi një takim dypalësh me Sekretarin e Thesarit të SHBA-së, Scott Bessent. Sipas Ministrisë ruse të Financave, ata diskutuan bashkëpunimin financiar në kuadër të G20-ës, ndërsa një zyrtar amerikan tha se takimi u përqendrua te plani i paqes i Presidentit Donald Trump për Ukrainën.
I pyetur për ftesën ndaj Siluanov, Trump u tha gazetarëve: “Na pëlqen të shkojmë mirë me të gjithë. Një nga arsyet pse jam kaq i suksesshëm është se shkoj mirë me të gjithë.”
Zyrtarët evropianë e kritikuan vendimin. Ministri polak i Financave, Andrzej Domanski, tha se nuk ishte i kënaqur që shihte Moskën të përfaqësuar, megjithëse pranoi të drejtën e organizatorëve të G20 për të ftuar mysafirë, shkruan Al Jazeera.
Ministri gjerman i Financave, Lars Klingbeil, tha se mirëpritja e Siluanov nga SHBA-ja dërgoi një “sinjal që e konsideroj shqetësues”.
Ai shtoi se Evropa po përgatiste një paketë të re sanksionesh ndaj Rusisë dhe shpresonte në bashkëpunim të ngushtë me Uashingtonin.
Ministrat evropianë dhe bankierët qendrorë kundërshtuan gjithashtu praninë e Siluanov në “foton familjare” tradicionale të G20-ës. Në fund, fotografia u realizua pa ministrin rus.
