Superliga e Kosovës në futboll rikthehet në këtë fundjavë, me katër duele që do të zhvillohen ndërmjet të shtunës dhe të dielës dhe një ndeshje e cila është shtyrë për më vonë.
Liga elite e futbollit, i gjen ekipet në vlugun e përgatitjeve dhe dy skuadra që ende janë duke luajtur në garat evropiane.
Kampioni i Kosovës, Ballkani, që të enjten u mposht në ndeshjen e parë të rundit të tretë, në Ligën e Konferencës nga ekipi Larne i Irlandës së Veriut, sezonin e ri në Superligë e nis me përballjen ndaj Dukagjinit.
Ekipi i Ilir Dajës, e nis mbrojtjen e titullit të dy viteve të fundit, me ndeshjen në shtëpi, por me shumë ndryshime në skuadër, që megjithatë mbetet skuadra favorite ende pa nisur gara. Përballë është ekipi nga Klina që poashtu paraqitet me fytyrë të re dhe shumë ndryshime dukagjini udhëhiqet nga ish-trajneri i Ballkanit, Ismet Munishi, që ka rinovuar komplet ekipin simpatik nga Klina.
Kjo ndeshje luhet të dielën nga ora 17:00, por që java e parë nis me dy përballjet të shtunën, Llapi – Gjilani dhe Ferizaj – Feronikeli ‘74.
Të dëshpëruar nga paraqitjet në dy garat evropiane, Europa League e Conference League, gjatë verës, ekipi i Tahir Batatinës, me pak përforcime, por të duhura përballë kanë Gjilanin, që riktheu në elitë trajnerin Ardian Nuhiu që sivjet i prin ekipit me ndryshime dhe me synime të tjera për dallim nga sezoni i fundit.
Të dielën, dueli tjetër interesant është Prishtina – Suhareka, që zhvillohet në mbrëmje nga ora 19:00, në stadiumin “Fadil Vokrri”.
Bardhekaltrit kthehen në shtëpinë e vet dhe kanë ftuar tifozët ta ndihmojnë ekipin që në këtë edicion drejtohet nga francezi me përvojë, Jean-Michel Cavalli. Përballë Prishtinës, është ekipi i debutues në Superligë, Suhareka, që do të udhëhiqet nga trajneri i njohur shqiptar Shpëtim Duro, me ndihmësin e tij, Debatik Curri, trajneri i fundit, që Prishtinës i solli një trofe.
Ndeshja e vetme që nuk do të luhet në këtë xhiro është ajo ndërmjet Dritës e Malishevës, pasi ekipi gjilanas, ka zhvilluar ndeshjen në garën evropiane të Ligës së Konferencës dhe do të përgatitet për duelin e kthimit, që luhet në mesjavën e ardhshme.
