Volejbollistet e Përfaqësueses së Kosovës kanë regjistruar rezultat historik të premten në Pallatin e Rinisë dhe Sportit në Prishtinë.
Kosova fitoi 3:0 ndaj Malit të Zi në Ligën Evropiane të volejbollit.
25:19, 25:21 dhe 25:15 ishte rezultati i seteve të fituara nga volejbollistet e Kosovës.
Federata e Volejbollit e Kosovës e ka vlerësuar historike fitoren e së premtes.
“Kombëtarja e Kosovës në volejboll për femra ka shkruar një nga faqet më të bukura të sportit tonë, duke e mposhtur Malin e Zi me rezultat bindës 3:0 në kuadër të CEV Volleyball European League!. Një paraqitje spektakolare, me karakter, disiplinë dhe shpirt luftarak, që nuk i la asnjë mundësi kundërshtarit. Fitorja bëhet edhe më e madhe duke pasur parasysh se vetëm pak javë më parë Mali i Zi ishte jo larg kreut në këtë garë. Në Pallatin e Rinisë, para publikut të saj, Kosova tregoi se po rritet me hapa të mëdhenj në skenën evropiane dhe se mund të sfidojë çdo kundërshtar”, ka shkruar FVK-ja ndër të tjera.
