Protestën e filluan para objektit të KEDS-it.
Dhjetëra protestues kundërshtuan kërkesën e kësaj kompanie, që faturat e energjisë elektrike të shtrenjtohen për 21.3%
Faturat e rrymës, ata thonë se edhe tash janë të larta.
“E kam pas pesëdhjetë euro, tash 333 euro. Më japin pare dikush, i marr hua te miqtë, vëllezërit, dajtë, baba gjithë më jep, nëna thotë pa bukë rri, e me ti dhanë mos me mbetë borxhe në shtet”, deklaroi qytetari Sylejman Krasniqi.
Kërkesa që çmimi i rrymës të rritet, po konsiderohet si vjedhje.
“Na thonë se pa KEDS nuk do të kishim dritë në lagjet tona, na thonë se pa KEDS nuk do të kemi ngrohje në lagjet tona. Na thonë se problemi është te konsumi ynë i tepërt dhe jo te apetiti i KEDS-it. Vjet u vodhën prej 16.1 për qind, që na bënë trekëndëshi KEDS–ZRRE–Qeveri. Edhe sivjet po duan me na e trashë edhe më shumë e me na thënë se ka rritje tjetër prej 20 për qind, është një hile e zanatit të KEDS”, tha aktivisti Erblin Ajdini.
“Këta na shkatërruan me këtë rrymë, e kanë shtrenjtuar që katër herë po thonë me shtrenjtuar e atë 21% po, kjo nuk është në rregull”, tha qytetari tjetër Adem Mehmeti.
E pranë ndërtesës së Qeverisë, fillimisht turma e njerëzve u ndalua nga Policia.
Por, më pas një grup i protestuesve vazhdoi duke vendosur disa pankarta në shkallët e ndërtesës së qeverisë.
Ndonëse nën reshje të shiut, protesta zgjati rreth dy orë.
E në rast se çmimi i energjisë elektrike shtrenjtohet, protestuesit paralajmëruan veprime të tjera.
