Liria e Prizrenit ka reaguar pas humbjes në Klinë nga Dukagjini me rezultatin 2:1. Në fakt, Liria u mposht në minutën e 106-t të takimit dhe pas penalltisë së përsëritur, të cilën dy herë nuk e realizoi Blerind Morina.
Mirëpo, Morina përfitoi nga topi i kthyer prej Stivi Frashërit për ta shënuar golin e fitores. Në reagimin e Lirisë në Facebook, thuhet se referimi në duelin kundër Dukagjinit ishte skandaloz. Ndërkohë, gjyqtarin Vigan Ibërdemaj e ka quajtur regjisor të fitores së ekipit nga Klina.
“Ndeshja e zhvilluar në Klinë, mezi gjeti fundin. Ndonëse, loja u zhvillua në presion, sidomos nga gjyqtari Ibërdemaj dhe , ajo pati përfundim absurd. Zgjatja pa nevojë e ndeshjes, kur në min. 99 u akordua penallti e cila u përsërit derisa Dukagjini shënoi gol. Kjo çfarë ndodhi në Klinë i qoftë për turp Viganit dhe shokëve të tij. Ne, na u vidh pika që e merituam, e në bazë të rasteve merituam edhe më shumë. Ftojmë organet e FFK-së që të marrin masa ndaj këtyre ‘gjyqtarëve’, sepse kështu s’kanë çka kërkojnë në Prizren. Ne, nuk do të dorëzohemi. Do të luftojmë ndershëm deri në fund”, ka shkruar Liria në reagim.
