Prokuroria Themelore në Prizren ka njoftuar se ka paraqitur kërkesë në Gjykatën Themelore në Prizren për caktimin e masës së paraburgimit prej 30 ditësh ndaj të pandehurit E.J., i cili aktualisht ndodhet në ndalim 48-orësh, për shkak të dyshimit të bazuar se ka kryer veprën penale “Keqpërdorimi i pozitës apo autoritetit zyrtar”.
Sipas Prokurorisë, i pandehuri në cilësinë e ndërmjetësuesit të licencuar dyshohet se ka tejkaluar kompetencat e tij duke përpiluar dokumente dhe marrëveshje fiktive ndërmjetësimi.
Përmes këtyre veprimeve, dyshohet se ka përfituar për vete ose për persona të tjerë, duke shkaktuar dëm material të konsiderueshëm.
Hetimet janë zhvilluar për disa muaj në bashkëpunim me Policinë e Kosovës, përkatësisht Drejtorinë për Hetimin e Krimeve Ekonomike dhe Korrupsionit, në kuadër të rastit të njohur si “Pronat në Prizren”.
“Hetimi ka zbuluar se të dyshuarit kanë përdorur dokumente dhe procedura fiktive për të ndërmjetësuar pronat kadastrale të një personi të ndjerë, i cili kishte ndërruar jetë disa dekada më parë. Përmes këtyre veprimeve, janë ndryshuar pronësitë e 18 parcelave tokësore më fshatin Lokvicë, Komuna e Prizrenit, me vlerë rreth 1,000,000 euro, duke shkaktuar dëm material për pronarët ligjorë”, thuhet në njoftim.
Në lidhje me rastin po hetohet edhe i dyshuari V.Z., i cili ndodhet në arrati dhe dyshohet për veprat “Falsifikimi i dokumenteve” dhe “Legalizimi i përmbajtjes së rreme”.
“V.Z. dyshohet se, duke falsifikuar dokumentet publike dhe në koordinim me E.J., ka lidhur marrëveshje ndërmjetësimi përmes së cilës ka bartur 18 ngastra kadastrale në emër të tij”, theksohet në njoftim.
Po ashtu, nën hetim është edhe A.G. për “Keqpërdorim të pozitës apo autoritetit zyrtar”.
Autoritetet kanë sekuestruar 14 mijë e 600 euro, telefona celularë dhe dokumente relevante, si dhe kanë urdhëruar ngrirjen e përkohshme të 18 parcelave të paluajtshmërive, për të siguruar gjendjen e tyre deri në përfundim të hetimeve.
Hetimet po vazhdojnë me qëllim identifikimin e të gjithë të përfshirëve dhe sigurimin e provave shtesë.
“Prokuroria Themelore në Prizren vazhdon të mbetet e përkushtuar në luftën ndaj kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligji”, nënvizohet në fund të njoftimit./teve1.info/
