Sulmuesi i krahut, Milot Rashica është ndarë tepër i kënaqur me golin që e shënoi në fitoren e Beshitashit në ndeshjen e fundit kampionale.
Beshiktashi, triumfoi 2:1 në shtëpi ndaj Eyupsporit në kuadër të xhiros së gjashtë për t’u ngritur në kuotën e 13-të pikëve, 5 më pak se Galatasaray që është lider dhe i ka fituar të gjitha ndeshjet deri më tani.
Rashica ishte startues dhe luajti deri në minutën e 90-të kundër Eyupsporit, ndërsa golin e realizoi në minutën e 20-të për të zhbllokuar rezultatin e ndeshjes dhe për ta kaluar Beshiktashin në epërsi.
Për Rashicën, ky është goli i tij i parë këtë sezon në kampionat, ku i ka edhe dy asistime në 5 ndeshje të luajtura.
“Kishim nevojë për të kompensuar pikët që i lëshuam javën e shkuar, kështu që patjetër na duhej fitorja në këtë përballje. Megjithatë, jam shumë i lumtur për këtë fitore dhe mbi të gjitha që arrita të kontribuoj me gol”, ka thënë Rashica për faqen zyrtare të Beshiktashit.
28-vjeçari është pjesë e Beshiktashit prej verës së shkuar dhe me ekipin turk ka kontratë deri në vitin 2027.
