Profesori Sadri Ramabaja ka mbështetur deklaratën e kryeministrit Albin Kurti, i cili së fundi e ka quajtur opozitën “nomadë”, për shkak të pamundësisë për të formuar Kuvendin e Kosovës.
I ftuar në emisionin “Info Nata” në Tëvë1, Ramabaja tha se ky është një përshkrim shumë i butë krahasuar me atë që, sipas tij, opozita realisht meriton.
“E paktë është t’i quash nomadë ata të cilët nuk janë të aftë të krijojnë institucion. Do të thotë se nuk janë të përgatitur të jenë deputetë, prandaj duhet të shkonin të ruanin bagëtinë, e jo të tallen me popullin. Kjo është fyerje që i bëjnë qytetarët deputetë”, deklaroi Ramabaja.
Ai shtoi se termi “nomadë” nuk është aspak fyes, përkundrazi, është një përshkrim i butë për sjelljen e opozitës.
Në lidhje me një deklaratë të ish-presidentit amerikan Donald Trump, i cili shprehu gatishmëri për të ndihmuar në zgjidhjen e çështjes Kosovë–Serbi, Ramabaja theksoi rëndësinë e funksionimit institucional.
“Për këtë ne duhet të zgjidhnim këtë situatë, të kemi Kuvend dhe të jemi të përgatitur. Sepse sipas të gjitha gjasave, në këtë ri-pozicionim dhe rirreshtim gjeopolitik, shqiptarët duhet të dalin fitues. Kjo do të thotë se duhet të ecim drejt krijimit të federatës shqiptare,” përfundoi ai.
