Ka plot qenë endacakë që janë të pranishëm në secilën lagje të Prishtinës.
E prania e madhe e qenve endacakë në kryeqytet vazhdon të jetë problematikë e madhe.
Pas tyre janë vënë disa punonjës të angazhuar nga Drejtoria e Shërbimeve Publike.
Kjo drejtori ka hapur një faqe në rrjetin social Facebook për të raportuar praninë e qenve endacakë nëpër zona të Prishtinës.
Aty postojnë edhe shifra të qenve të kapur.
Por, qytetarët ende nuk po e shohin ndryshimin.
“Ka heqë diçka, por jo, ka shumë, shumë ka. Fëmija po tuten qysh jo, edhe të rriturit ka qenë shumë, shumë ka s’di çka u bë më ta”, ankohet qytetari Hajdin Hasani.
“Gjithkah ku të dalësh, ku të shkosh, nëpër park ka qenë. Jo jo hiç valla, boll hiç, kurgjo nuk kemi vërejt ndryshim, gjithkah ka, kurgjo hiç s’është bë, kish ndryshu me pas hek”, tha qytetari tjetër, Rexhep Musa.
Frikën nga qenët e ka tash e sa kohë ky prishtinas që pësoi nga ta.
“Më ka hëngër qeni edhe jam hi jam ul, se mu dok pak nuk është shumë por e pash që më dhimbke këmba kur e shikova dy dhëmbë mi kish pas ngul. Tash kur e shoh një qen i largohem s’di sa i shkoj rrethit a përpara shkova nuk më interesoje, tash duke me laku rrugën e me ju largu pak se po kom marr frikë”.
Edhe nga opozita në kryeqytet thonë se situate me qenë nuk është përmirësuar siç pritej ani pse është provuar në disa mënyra.
“Problematika me qentë endacak vazhdon të jetë shqetësim shumë i madh për qytetarët, ne nuk shohim përmirësim përmbajtjesor të largimit të qenve nga rrugët e Prishtinës. Përjashta sheshin qendror ku vërehet që ka më pak qenë të gjitha rrugët dhe lagjet e tjera janë të stërmbushura me qenë, kryesisht te vend grumbullimet e mbeturinave qenë ka shumë dhe aty bëhen edhe më të rrezikshëm. Edhe pse është provuar të ndërtohet një strehimor në Hajvali si duket është e pamjaftueshme dhe ka pasur iniciativa të dështuar sikur ajo me pagesën 50 euro me adaptuesit e qenve e cila nuk ka provuar një rezultat të kënaqshëm për largimin e qenve nga qyteti”, thotë asamblisti i VV-së, Faton Zeka.
Por, Komuna e Prishtinës vlerëson që janë bërë hapa të konsiderueshëm në kapjen e qenve.
“Situata është përmirësua mund të them dukshëm. Fokusi ynë fillestar ka qenë në zonën 1 apo siç njihet ndryshe, zona qendër edhe në lagjet përreth siç janë lagjia ‘ Aktash’, ‘Pejton’, ‘Dardania’, ‘ Ulpiana’, dhe jemi duke zgjeruar operacionin tonë në zonat e tjera të qytetit”, thotë zyrtari i Drejtorisë së Shërbimeve Publike në kryeqytet, Shkelqim Mustafa.
Tutje Mustafa, tregon se a ju ka ndihmuar linja telefonikë për raportim të qeneve në përmirësimin e situatës.
“Kemi gjetur edhe një bashkëpunim të mirë me qytetarët e kryeqytetit. Me qytetarët kemi më shumë kontakt ku i kemi hapur linjat telefonike dhe ato përmes email adresës ku janë aktive 24/7 për raportim të ankesave në kryeqytet”.
Nga drejtoria e shërbimeve publike në kryeqytet thonë se deri më tani janë trajtuar 4 mijë qenë endacakë dhe një mijë të adaptuar.
