Gjithçka u bë gati.
Si rrallëherë, një takim po mbahej në një vend jo fort të zakontë.
Kjo pasi këtë të shtunë, Kosova e Maqedonia e Veriut u bënë edhe me një pikë të përbashkët kufitare, Han i Elezit – Bllacë.
I pari që erdhi ishte kryeministri i shtetit fqinj, Hristijan Mickoski.
Nuk vonoi shumë, aty u pa edhe kryeministri në detyrë, Albin Kurti.
Pasi i zgjatën dorën njëri–tjetrit, dyshja u nisën për të zënë vendet e tyre.
Me të marrë fjalën, Kurti tha se ky pikëkalim do u mundësojë qytetarëve lëvizje më të shpejtë.
“Tani e tutje, qytetarët do të kontrollohen vetëm në hyrje të shtetit pritës, ndërkohë që të dhënat do të shkëmbehen në kohë reale përmes një sistemi të përbashkët teknologjik…vetëm gjatë vitit 2024, mbi 5 milionë qytetarë kaluan në tri pikat kufitare mes Kosovës dhe Maqedonisë së Veriut. Kjo shifër dëshmon për lidhjet mes njerëzve tanë, por edhe për nevojën për lëvizje të lirë – si të qytetarëve, ashtu edhe të mallrave”, tha Kurti.
Që kufiri nuk duhet të jetë një mur, por një urë lidhëse mes të dyja vendeve, e tha Mickoski.
“Për qytetarët kjo nënkupton më shumë kohë për familjen, për punën, për jetën. Sot, këtu, në mënyrën më të mirë demonstrojmë që kufiri nuk duhet të jetë një mur – kufiri mund dhe duhet të jetë një urë, urë e përbashkët që lidh njerëzit, idetë dhe mundësitë. Urë përmes së cilës flasim dhe dëshmojmë për besim, bashkëpunim, shkëmbim ekonomik, zhvillim të kulturës dhe turizmit”, tha Mickoski.
Derisa zëvendëskryeministri i parë i Maqedonisë së Veriut, Izet Mexhiti, tha se tani po fillon një histori e re bashkëpunimi.
“Thirrja jonë e përbashkët sot nga ky vend është: integrimi tani. Në Bllacë, aty ku para 26 vitesh u vu në provë njerëzimi dhe përcaktimi për lirinë, për bashkimin, për të ardhmen. Sot, simbolikisht, po nisim një histori të re bashkëpunimi për zhvillim dhe përparim. Me këtë inaugurim po shënojmë një moment të rëndësishëm për lirinë e lëvizjes së njerëzve dhe të mallrave”, tha Mexhiti.
Hap të rëndësishëm për të dyja vendet, e quajtën edhe dy ministrat e Punëve të Brendshme të të dyja shteteve.
“Takimi ynë i përbashkët këtu shënon një hap të rëndësishëm të bashkëpunimit mes Kosovës dhe Maqedonisë së Veriut, me një rezultat konkret që kontribuon në lehtësimin e qarkullimit kufitar dhe ndërveprimin e qytetarëve të dy vendeve tona. Sot po kurorëzojmë një marrëveshje të suksesshme mes ministrive të Brendshme të qeverive tona, e cila mundëson kalimin kufitar ‘një ndalesë, një kontroll’, si në këtë pikë kufitare, ashtu edhe në atë të Glloboqicë–Jazhincë. Ky është pa dyshim një pasqyrim i aspiratave tona të përbashkëta për kufij të hapur, por të sigurt”, tha ministri në detyrë i Punëve të Brendshme, Xhelal Sveçla.
“Qëllimi është i qartë: kalim më i lehtë, më i sigurt dhe më i shpejtë i kufijve për udhëtarët. Kjo do të thotë një kontroll në vend të dy kontrolleve, pritje më të shkurtra, një eksperiencë më e mirë dhe, nga ana tjetër, punë më efikase, koordinim më i mirë, dhe luftë më e fortë kundër aktiviteteve të paligjshme”, tha homologu i Sveçlës, Pançe Thoshkovcki.
E krejt në fund, për të përuruar këtë pikëkalim, të gjithë bashkë kaluan në këmbë kufirin.
Ceremonia përfundoi me një shkëmbim duarsh e përqafim mes Kurtit e Mickoskit.
Hapja e pikëkalimit të përbashkët vjen pas një takimi mes dy qeverive nëntorin e kaluar në Prishtinë.
Kosova i ka tri pika zyrtare kufitare me Maqedoninë e Veriut, ndërsa kontrolli i përbashkët kufitar do të vlejë në dy prej tyre, përfshirë atë Glloboqicë – Jazhincë.
