Qindra dronë që kishin në shënjestër Moskën dhe rajonin përreth vranë të paktën dy persona dhe dëmtuan një rafineri të madhe në ditën e fundit të zgjedhjeve parlamentare të vendit, thanë autoritetet të dielën.
Kryebashkiaku i kryeqytetit tha se më shumë se 1,600 dronë ishin kapur dhe rrëzuar, 450 prej të cilëve kishin për qëllim Moskën.
Sergei Sobyanin akuzoi Urainën se po përpiqet të ndërhyjë në zgjedhjet tre-ditore të kontrolluara rreptësisht, të cilat pritet të forcojnë kontrollin 26-vjeçar të presidentit Vladimir Putin në pushtet.
“Sulmi i paprecedentë ishte planifikuar qartë me qëllim prishjen e zgjedhjeve. Armiku nuk pati sukses”, tha ai në Telegram.
Guvernatori rajonal i Moskës tha se të paktën dy persona u vranë – një grua 44-vjeçare dhe një burrë i moshuar – në dy vende të ndryshme, raporton Guardian.
Një zjarr i shkaktuar nga rrëzimi i një droni në një ndërtesë 21-katëshe çoi gjithashtu në evakuimin e 400 personave, tha guvernatori rajonal i Moskës, Andrey Vorobyov, pa specifikuar origjinën e droneve.
Sulmet vijnë në një kohë kur Kievi intensifikoi fushatën e sulmeve me dronë me rreze të gjatë veprimi kundër Rusisë në muajt e fundit, veçanërisht kundër infrastrukturës energjetike.
Sulmi i fundit vjen pasi presidenti i SHBA-së, Donald Trump, tha të hënën se Ukraina dhe Rusia kishin rënë dakord të mos sulmonin objektet energjetike të njëra-tjetrës.
Kjo vjen gjithashtu pasi rusët filluan të votojnë të premten në zgjedhjet e para parlamentare të vendit që nga fillimi I luftës në shkurt 2022.
