Koalicioni i kancelarit gjerman, Friedrich Merz prezantoi të enjten një paketë reformash që synon të nxisë rritjen ekonomike dhe konkurrueshmërinë e Gjermanisë.
Masat përfshijnë lehtësime tatimore për familjet me të ardhura të ulëta, ulje të burokracisë, ndryshime në tregun e punës dhe reforma të pensioneve.
Qeveria synon t’ua lehtësojë kompanive punësimin me kontrata afatshkurtra dhe të kufizojë abuzimin me lejet mjekësore. Paketa mori vlerësime pozitive nga disa ekonomistë dhe punëdhënës, por u kritikua nga sindikatat dhe ekspertë të tjerë si e padrejtë ose e pamjaftueshme.
“Ne duam ta rikthejmë Gjermaninë në rrugën e duhur”, u tha Merz gazetarëve, citon Reuters.
Qeveria po përballet me presion për të ringjallur ekonominë, e cila është goditur nga konkurrenca në rritje nga Kina, çmimet e larta të energjisë dhe ngadalësimi i rritjes. Në prill, ajo përgjysmoi parashikimin e rritjes ekonomike për vitin 2026 në 0.5%.
“Qeveria ka demonstruar aftësinë e saj për të rënë dakord mbi reformat kryesore strukturore dhe për t’i zbatuar ato deri në fund të vitit”, tha Marion Muehlberger nga Deutsche Bank Research, duke e quajtur paketën një nga më të rëndësishmet në dekada.
“Kjo ka të ngjarë të rrisë besimin dhe përforcon parashikimin tonë për përshpejtimin e rritjes ekonomike në gjysmën e dytë të vitit.”
Ministri i Financave Lars Klingbeil tha se qeveria do të ndjekë një kurs më të ashpër ndaj Kinës dhe do të mbrojë kompanitë gjermane nga konkurrenca e padrejtë.
Reformat e pensioneve parashikojnë një fond pensionesh në stilin suedez dhe rritje graduale të moshës së daljes në pension, por janë kundërshtuar nga sindikatat dhe punëdhënësit.
“Dobësia më e madhe e paketës së reformës është mungesa e masave për të konsoliduar shpenzimet qeveritare”, tha Presidenti i institutit Ifo, Clemens Fuest. “Lehtësimi i taksave nuk është i realizueshëm në afat të mesëm, përveç nëse frenohet rritja e shpenzimeve qeveritare.”
Ndryshimet e propozuara për lejet mjekësore u kritikuan gjithashtu. Markus Blumenthal-Beier, kreu i Shoqatës Gjermane të Mjekëve të Përgjithshëm, tha se ato ishin “absolutisht katastrofike” dhe se do të bllokonin sistemin shëndetësor.
