Qerimi në një intervistë për emisionin “Ditari” në Tëvë1, tha se në Komisionin për Arsim ku është diskutuar për buxhetin e UP-së, ka folur për nevojën për ndryshimin e statutit.
Sipas tij, në atë takim nga anëtarët e komisionit nuk ka pasur kundërshtim, por e çmojnë rëndësinë e ndryshimit të statutit.
“Është koha e duhur që të statuti të rishihet dhe të ribëhet. Sa i përket mbështetjes nga mekanizmat e tjerë institucional, për sa i përket procedurës së brendshme është Këshilli Drejtues që bën propozimin dhe senati akademik i universitetit që e miraton statutin. Sipas rregullit statuti i përcillet ministrisë se arsimit dhe ajo e paraqet atë në Kuvend. Kisha një mbledhje të parë në Komisionin për Arsimin në Kuvend në kontekstin e një dëgjimi buxhetor për buxhetin e Universiteti të Prishtinës. Në atë kontekst unë kisha rastin që të paraqisja pjesë të këtij vizioni që kam artikuluar publikisht përfshirë nevojën për ndryshimin e statutit. Nga ai takim kuptova që jo që nuk ka kundërshti por anëtarët e komisionit e çmojnë rëndësinë e ndryshimit të statutit”, deklaroi Qerimi.
Ai thotë se në dy apo tre muajt e ardhshëm është periudha për konceptimin e një drafti të konsoliduar të statutit.
“Po bëj plan që shpejt t’i propozoj këshillit drejtues, ndërmarrjen e masave për krijimin e grupit punues që do të merret me hartimin të një drafti tillë. Dy tre muajt e ardhshëm është një periudhë e mjaftueshme realiste për konceptimin e një drafti të konsoliduar të statutit, i cili pastaj do të përcillet më tej”, theksoi ai. /Teve1.info/
