Qendra e Lëvizjes Vetëvendosje në Prishtinë, e ka quajtur të papranueshme shfrytëzimin e sheshit të qytetit si hapësirë afariste për shikimin e ndeshjeve të Kampionatit Evropian me pagesë.
Nga kjo qendër thonë se askush nuk ka të drejtë të mbyll sheshin ose një pjesë të sheshit për një kategori të caktuar të qytetarëve.
Ata thonë se në vazhdimësi kanë denoncuar dhe sinjalizuar për tendencën e vazhdueshme të Përparim Ramës dhe LDK-së për ta vënë publiken në shërbim të privates.
“Askush nuk ka të drejtë të mbyll sheshin ose një pjesë të sheshit për një kategori të caktuar të qytetarëve. Këtë mund ta bëjnë në ndonjë lokal apo pronë të tyren, me ose pa pagesë – por sheshi është vendi i barazisë qytetare dhe veprimet e tilla janë të papranueshme dhe kërkojnë reagim. Gjithashtu duhet potencuar se janë të pavërteta dhe të pasakta deklaratat e Kryetarit Rama se “çdo gjë ka qenë pa pagesë”. Mbi këtë temë dhe për çështje të pagesave të kërkuara në atë zonë, kanë shkruar paraprakisht edhe gazetarë të mediumeve të ndryshme dhe kanë reaguar qytetarë të shumtë”, thuhet mes tjerash në reagimin e tyre.
