Kolegji i Gjykatës Supreme të Kosovës ka refuzuar si të pathemeltë ankesën e Lëvizjes Vetëvendosje (LVV) kundër vendimit të Panelit Zgjedhor për Ankesa dhe Parashtresa (PZAP), duke lënë në fuqi gjobën prej 5.100 eurosh të shqiptuar për përfshirjen e një fëmije në një aktivitet të fushatës zgjedhore.
Sipas njoftimit të Gjykatës Supreme, PZAP kishte pranuar më herët si të bazuara ankesat e Lidhjes Demokratike të Kosovës (LDK) dhe Organizatës Joqeveritare “Instituti i Kosovës për Drejtësi” (IKD), duke konstatuar shkelje të rregullave zgjedhore nga LVV.
“Kundër këtij vendimi, LVV kishte ushtruar ankesë në Gjykatën Supreme, duke kontestuar ligjshmërinë e vendimit të PZAP-së. Pas shqyrtimit të pretendimeve ankimore, përgjigjeve në ankesë dhe të gjitha shkresave të lëndës, Gjykata Supreme gjeti se ankesa është e pathemeltë”, thuhet në njoftim.
Sipas Gjykatës, nga provat e administruara rezulton se më 31 maj 2026, gjatë një tubimi zgjedhor të organizuar nga LVV në Vushtrri, një vajzë 10-vjeçare kishte dalë në skenë dhe kishte recituar para pjesëmarrësve, e veshur me veshje që përmbanin logon e subjektit politik.
“Ankesat e paraqitura në PZAP kishin pretenduar se pjesëmarrja aktive e fëmijës në një aktivitet të organizuar zgjedhor përbën angazhim të një personi nën moshën 15-vjeçare në fushatë zgjedhore, në kundërshtim me rregullat zgjedhore në fuqi”, thuhet në vendim.
Gjatë procedurës para PZAP-së, LVV kishte argumentuar se e mitura nuk ishte pjesë e programit të organizuar të tubimit dhe se iniciativa për paraqitjen e saj kishte ardhur nga vetë ajo, në prani të prindit.
Megjithatë, Gjykata Supreme ka vlerësuar se këto pretendime nuk qëndrojnë.
“Për ekzistimin e shkeljes nuk është vendimtare nëse iniciativa për pjesëmarrjen e të miturës ka ardhur nga organizatori apo nga vetë e mitura, si dhe nuk ka rëndësi nëse ka pasur koordinim apo planifikim paraprak. Fakt përcaktues është se organizatori i aktivitetit ka lejuar pjesëmarrjen aktive të një fëmije në një aktivitet zgjedhor”, thekson Gjykata.
Në arsyetimin e saj, Gjykata iu referua nenit 5, paragrafi 3 të Rregullores Zgjedhore nr. 07/2024, i cili përcakton se “asnjë subjekt politik i certifikuar nuk mund të angazhojë persona nën moshën pesëmbëdhjetë (15) vjeç në fushatën zgjedhore”.
“Organizatori i tubimit ka përgjegjësi për menaxhimin e aktivitetit dhe për personat që paraqiten në skenë para pjesëmarrësve. Në rrethanat e rastit konkret, e mitura kishte marrë pjesë në mënyrë aktive në aktivitetin zgjedhor, fakt i mbështetur edhe nga provat e administruara në lëndë”, thuhet në njoftim.
Duke marrë parasysh qëllimin e dispozitave ligjore për mbrojtjen e interesit më të mirë të fëmijëve dhe ndalimin e përfshirjes së tyre në fushata zgjedhore, Gjykata Supreme konstatoi se vendimi i PZAP-së është i drejtë dhe i bazuar në ligj, duke refuzuar ankesën e LVV-së dhe duke lënë në fuqi gjobën prej 5.100 eurosh.
