Presidenti rus Vladimir Putin është pajtuar të mërkurën që të rifillojë negociatat tre-palëshe muajin e ardhshëm me Uashingtonin dhe Kievin, me qëllim përfundimin e luftës në Ukrainë, ka njoftuar një zyrtar i Kremlinit.
Udhëheqësi rus është pajtuar “në parim” të rifillojë bisedimet pas 10 nëntorit, u tha gazetarëve këshilltari i Putinit për çështjet e jashtme, Yuri Ushakov, pas një takimi në Shën Petersburg midis Putinit dhe të dërguarit të Presidentit të SHBA-së Donald Trump, Steve Ëitkoff.
Bisedimet do të përqendrohen në “ndërtimin e një sistemi sigurie për Rusinë dhe Ukrainën pas përfundimit të konfliktit”, tha Ushakov.
Bisedat e Ëitkoff me Putinin rreth pushtimit në shkallë të plotë të Ukrainës nga Moska u zhvilluan ndërsa Trump e shtyu Kievin të bënte një marrëveshje që ndalonte luftimet.
Presidenti ukrainas Volodymyr Zelensky ka këmbëngulur se vetëm një samit udhëheqësish mund ta zgjidhë ngërçin.
Diskutimi në Shën Petersburg zgjati rreth tre orë, tha Kremlini, dhe erdhi një ditë pasi Ëitkoff u takua me Zelenskyn dhe disa udhëheqës evropianë në kryeqytetin e Norvegjisë, Oslo, raporton AP.
Propozimet nga takimi i Oslos “përmbanin pak vlerë të vërtetë në kontekstin e zgjidhjes së krizës ukrainase”, tha Ushakov.
Megjithatë, ai më vonë i tha televizionit shtetëror rus se, ndërsa Moska nuk është “plotësisht e kënaqur” me propozimet e Oslos, ato janë një hap në drejtimin e duhur.
Të dy ushtritë mbeten të bllokuara në fushën e betejës dhe të dy vendet e godasin njëra-tjetrën me sulme të përditshme me rreze të gjatë veprimi.
Përfaqësuesit e tre vendeve zhvilluan tre raunde negociatash në fillim të këtij viti, duke u takuar dy herë në Abu Dhabi në janar dhe shkurt, të ndjekura nga bisedime të mëtejshme në Gjenevë në shkurt, të cilat shënuar progres të pakët.
