Një e nga një ia mësyn Komunës së Prishtinës.
Kësisoj, për të tretën ditë me radhë po pozicionohen këtu.
Janë këta punëtorët e Trafikut Urban dhe të linjave private, që ditën e tretë të protestës për borxhin që ka Komuna e Prishtinës ndaj tyre, po e kundërshtojnë në këtë formë.
Më kërkesa të njëjta si dy ditë më parë janë edhe sot sindikalistët.
“Fatkeqësisht sot është dita e tretë e protestës,reflektim ndoshta ka pak por mjetet nuk kanë dalë në llogarinë për sektorin privat është fjala, për Trafikun Urban diku tre muaj ose muaji i tretë tash vjen. Shprehim keqardhje për udhëtarët që sot nuk kanë transport, puna do të vazhdojë atëherë kur mjetet dalin në llogaritë tona dhe i shlyen borxhet tona të naftës dhe pagat e punëtorëve”, u shpreh Ismet Haliti – sekretar i sindikatës së operatorëve privat
Zgjidhje të problemit beson se do të ketë nesër, Ilmi Gashi, kryetar i Sindikatës së Trafikut Urban.
“Ne po shpresojmë që nesër do të mbarojë, po shpresojmë që në këtë mbledhje do të mbizotërojë arsyeja, unë nuk kam informacione pse nesër është mbledhje legjitime është e thirrur, ata që e shpallin jolegjitime janë instancat tjera prapa saj se për tu mbajt mbledhja do të funksionojë dhe besoj që do të bëhet votimi në asamble, do të dërgohet në Ministri dhe ministri do t’i alokojë mjetet”, tha Gashi.
Ani pse të mërkurën pritën këtu për tri orë me radhë, askush nga Komuna nuk doli për t’i ftuar në takim. Andaj edhe treguan se protesta nuk do të ndërpritet.
“Sindikata e Trafikut Uurban edhe ditën e tretë sot vazhduam me protestën deri në ora 13:00 që e kemi pasur të caktuar. Ora 13:00 po e përfundojmë protestën por nuk doli askush nga organet e Komunës t’i drejtohet masës. Nesër protesta vazhdon me të njëjtin ritëm, për orën e kohën informoheni më vonë”, tha ai.
Për t’i bërë zgjidhje kësaj kërkese, nga Komuna e Prishtinës kanë thirrur seancë të jashtëzakonshëm për të enjten, me mandatarët ekzistues.
