Një punëtor ka pësuar lëndime pasi ka rënë nga një lartësi gjatë punës në lagjen “Prishtina e Re”. I lënduari është dërguar menjëherë për trajtim mjekësor, ndërsa rasti është duke u hetuar nga autoritetet.
Zëdhënësja e policisë për rajonin e Prishtinës, Flora Ahmeti, ka konfirmuar për Tëvë1 se rasti është iniciuar si, “Asgjësim, dëmtim ose heqje e pajisjeve mbrojtëse dhe rrezikim i sigurisë në vendin e punës.”
“Sot në stacionin policor ‘Jugu’ në Prishtinë është iniciuar rasti për ngjarjen që ka ndodhur në lagjen Prishtina e Re, ku një person ka rënë nga një lartësi teksa ishte duke punuar. Ai është dërguar për tretman mjekësor”, tha Ahmeti.
Policia, në bashkëpunim me inspektorët e punës dhe prokurorinë, ka nisur hetimet për të sqaruar rrethanat e incidentit.
