Seanca gjyqësore për rastin e vrasjes së 22-vjeçarit Dardan Gashi, e ndodhur më 5 gusht 2022 në një lokal në Lipjan, ka nisur të mbahet sot në Gjykatën Themelore në Prishtinë.
Në këtë rast, Gazmend Selimi akuzohet për vrasje në bashkëkryerje.
Gjatë seancës së sotme pritet të dëgjohet pronari i lokalit ku ndodhi ngjarja, në cilësinë e dëshmitarit. Gjatë dëgjimit të tij, avokati i familjes së të dëmtuarit e ka ballafaquar dëshmitarin me pamjet e natës kritike.
Me nisjen e seancës janë publikuar pamje nga lokali ku ndodhi ngjarja, ndërsa dëshmitari është pyetur lidhur me atë që shihet në video dhe vendndodhjen e tij në momentet e paraqitura.
Rasti lidhet me ngjarjen e 5 gushtit 2022 në një lokal në Lipjan, ku nga të shtënat me armë zjarri mbeti i vrarë 22-vjeçari Dardan Gashi, ndërsa dy persona të tjerë u plagosën.
Sipas aktakuzës, ngjarjes i kishte paraprirë një mosmarrëveshje mes personave të përfshirë. Prokuroria pretendon se Gazmend Selimi fillimisht e kishte goditur Dardan Gashin, ndërsa më pas Muhamet Gashi kishte shtënë me armë zjarri.
Rasti po trajtohet në procedurë gjyqësore, ndërsa pretendimet e aktakuzës mbeten objekt i shqyrtimit nga gjykata.
