Nuk është gjithçka te ngrohja e fuqishme! Nga izolimi i mureve dhe dritareve te përdorimi i klimës, disa zgjidhje të thjeshta mund ta mbajnë shtëpinë më të ngrohtë pa shpenzime të mëdha
Në Norvegji, temperaturat gjatë dimrit mund të zbresin edhe nën minus 30 gradë Celsius. Megjithatë, shumë shtëpi arrijnë të ruajnë ngrohtësinë falë izolimit cilësor, dritareve efikase dhe sistemeve moderne të ngrohjes.
Dallimi nuk qëndron vetëm te fuqia e pajisjeve ngrohëse, por te mënyra si ndërtohet dhe mbrohet shtëpia nga humbja e nxehtësisë.
Për këtë arsye, disa nga praktikat norvegjeze mund të jenë veçanërisht të dobishme edhe për familjet tona, sidomos gjatë muajve kur faturat e energjisë elektrike rriten ndjeshëm.
1. Izolimi i mirë fillon nga muret dhe çatia
Një nga arsyet kryesore pse shtëpitë norvegjeze ruajnë temperaturën është izolimi termik.
Efikasiteti i tij matet me vlerën U, e cila tregon sasinë e nxehtësisë që kalon përmes një sipërfaqeje. Sa më e ulët kjo vlerë, aq më mirë ruhet ngrohtësia.
Në standardet norvegjeze, për muret e jashtme përdoren vlera të ulëta të transmetimit termik, ndërsa vëmendje e veçantë i kushtohet çatisë.
Për shtëpitë ekzistuese, izolimi i dyshemesë së papafingos së pangrohur me lesh mineral mund të jetë ndër investimet më ekonomike.
2. Edhe çarjet më të vogla mund ta ftohin shtëpinë
Në Norvegji, ndërtesat e reja shpesh kontrollohen me një metodë të quajtur blower door test.
Gjatë testimit, një ventilator krijon ndryshim presioni dhe mat sa ajër depërton përmes hapësirave të padëshiruara.
Nxehtësia nuk humbet vetëm përmes mureve. Ajri i ftohtë mund të hyjë nga hapësirat rreth dritareve, dyerve, kutive të roletave dhe kalimeve të tubave.
Prandaj, zëvendësimi i gomave izoluese dhe mbyllja e çarjeve mund të japin përmirësim të menjëhershëm, me shpenzime relativisht të vogla.
3. Dritaret cilësore bëjnë dallim të madh
Dritaret janë ndër pikat ku shtëpitë humbasin më shumë nxehtësi.
Në Norvegji përdoren gjerësisht dritare me tri shtresa xhami dhe korniza me izolim të mirë termik.
Këto e zvogëlojnë kalimin e nxehtësisë drejt ambientit të jashtëm dhe ndihmojnë në ruajtjen e temperaturës së brendshme.
Sipërfaqet e mëdha prej xhami mund të duken tërheqëse, por nëse nuk kanë karakteristika të mira izoluese, gjatë dimrit mund të shkaktojnë humbje të konsiderueshme të energjisë.
4. Ajër i freskët pa humbur gjithë ngrohtësinë
Shtëpitë e izoluara mirë kanë nevojë edhe për ventilim të kontrolluar, përndryshe lagështia mund të grumbullohet dhe të krijojë kushte për myk.
Në Norvegji përdoren sisteme ventilimi me rikuperim të nxehtësisë.
Ato largojnë ajrin e përdorur nga ambientet e brendshme, ndërsa ajri i freskët që hyn ngrohet pjesërisht nga energjia e ajrit që del.
Për banesat pa sisteme të tilla, një zgjidhje praktike është hapja e dritareve plotësisht për pesë deri në dhjetë minuta, sipas kushteve, disa herë gjatë ditës.
Kjo mundëson qarkullimin e ajrit pa i mbajtur dritaret gjysmë të hapura për orë të tëra.
5. Ngrohja efikase ul shpenzimet e energjisë
Në Norvegji përdoren gjerësisht pompat termike, përfshirë pajisjet ajër-ajër, të ngjashme me klimat inverter që përdoren edhe në vendin tonë.
Ndryshe nga ngrohëset e zakonshme elektrike, këto pajisje transferojnë nxehtësinë nga ajri i jashtëm në ambientin e brendshëm.
Në kushte të përshtatshme, për çdo kilovatorë energji elektrike të konsumuar, ato mund të sigurojnë disa kilovatorë energji termike.
Megjithatë, efikasiteti zvogëlohet kur temperaturat jashtë bien shumë, prandaj ka rëndësi zgjedhja e një pajisjeje të përshtatshme për klimën lokale.
Çfarë mund të bëni që këtë dimër?
Nuk është e nevojshme të rinovoni të gjithë shtëpinë për të përmirësuar ngrohjen.
Filloni me kontrollimin e dritareve dhe dyerve, zëvendësoni gomat e dëmtuara dhe mbyllni hapësirat nga depërton ajri i ftohtë, pa bllokuar ventilimin e nevojshëm.
Nëse jetoni në shtëpi private, kontrolloni izolimin e papafingos. Edhe një përmirësim relativisht i thjeshtë mund të zvogëlojë humbjen e nxehtësisë.
Përdoreni klimën inverter sipas udhëzimeve të prodhuesit dhe shmangni ndryshimet e panevojshme e të shpeshta të temperaturës.
Punimet më të mëdha, si izolimi i fasadës dhe zëvendësimi i dritareve, mund t’i planifikoni për pranverë, duke kërkuar materiale me karakteristika të mira termike.
Mësimi kryesor nga Norvegjia është i thjeshtë: nuk mjafton ta ngrohni shtëpinë, duhet edhe të pengoni largimin e nxehtësisë. Kështu përfitoni më shumë rehati dhe mund të ulni shpenzimet gjatë dimrit. /Telegrafi/
