Qumështi për foshnja “Aptamil”, gjen një përdorim të gjerë në Kosovë.
Mirëpo, në këtë produkt, është identifikuar prania e bakteries Bacillus cereus, prandaj Agjencia e Ushqimit dhe Veterinarisë ka kërkuar heqjen e këtij produkti nga tregu.
“Agjencia e Ushqimit dhe Veterinarisë e Kosovës njofton opinionin publik se, përmes Komisionit Evropian – Sistemit të Alarmimit të Shpejtë për Ushqim dhe Ushqim për Kafshë (RASFF), ka pranuar një njoftim lidhur me produktin ushqimor qumësht APTAMIL, në të cilin është identifikuar prania e bakteries Bacillus cereus, si dhe është kërkuar tërheqja e këtij produkti nga tregu.”, thuhet nga AUV-i.
Përveç qumështit “Aptamil”, AUV-i ka kërkuar që edhe largimin nga tregu të një lloji të mishit të pulës, në të cilin është identifikuar prania e bakterit Salmonella.
“Pas pranimit të njoftimit nga RASFF dhe me kërkesë të kompanisë KAJMAK SHPK, përmes inspektimeve të realizuara nga AUV, është vërtetuar prania e salmonelës në sasinë 2064 kilogramë mish pule. Pas konstatimit të këtij rasti, sasia e importuar është asgjësuar në përputhje me procedurat ligjore në fuqi dhe standardet e sigurisë ushqimore”, thuhet tutje.
Televizioni është interesuar gjatë ditës në AUV që të marrë informacione shtesë në lidhje me këto dy raste, mirëpo nuk ka pranuar përgjigje.
E qytetarët janë të shqetësuar me atë që konsumojnë.
“Kryesisht i ikim mishit të kuq e konsumojmë të bardhin po qe te i bardhi te mishi i pulës çka po bëhet, kështu që nuk je i sigurt. Unë, mendoj që ushqimi nuk është i sigurt fare edhe inspektori duhet të punoj më shumë e më profesionalisht”, shprehet Fatmir Ajeti – qytetar.
“Ndoshta është një lloj papërgjegjësie edhe institucioneve edhe vet neve konsumatorëve që nuk reagojmë pak më ashpër në raste konkrete aty mendoj që është problemi”, tha Hetem Kutllovci.
Qytetarët, sipas Selatin Kaçanikut nga shoqata konsumatori, duhet të jenë më të kujdesshëm me atë që konsumojnë.
“E para një milion artikuj nuk mund t’i kontrolloj as një agjencion e as një inspeksion mund t’i kontrollojmë vetëm se ne jemi një milion e gjashtëqind e jemi çdo ditë në treg e markete dhe sa janë ato të sigurta varet sa jemi ne të ngritur. Ne nuk guxojmë të blejmë asgjë pa e lexuar deklaracionin, ne nuk guxojmë të blejmë asgjë pa e blerë produktin, ne nuk guxojmë të blejmë asgjë me dy mendje”, tha ai.
Raste të ngjashme ku në mishin e pulës është gjetur bakteri e Salmonelës ka pasur edhe në të kaluarën
