Policia e Kosovës së bashku me Prokurorinë Speciale, sot i kanë bastisur 12 lokacione në pronat e zyrtarëve të NPB Prishtina. E lidhur me këtë çështje, Azdren Shala nga Partia Socialdemokrate, thotë se kryesia do ngrehë padi, duke theksuar se i besojnë ligjit dhe Prokurorisë.
Tutje, Shala deklaroi se këto bastisje po bëhen me synimin e vetëm për të thënë se PSD-ja nuk ka kredibilitet të flasë kundër korrupsionit.
“Ata e kanë ndërmend të ngrehin padi, sepse kjo nuk kalon kaq lehtë. Por, duhet respektuar procedurat, ne e respektojmë ligjin dhe vendimet e Prokurorisë dhe Gjykatave, e jo siç bën pushteti duke i respektuar në mënyrë selektive. Këto bastisje po bëhen për të thënë në fund që PSD-ja nuk ka kredibilitet të flasë kundër korrupsionit. Kjo është e papranueshme dhe nuk do t’ia arrijnë qëllimit. Jemi duke folur për një Qeveri, e cila me çdo kusht po tenton me e fshehë dështimin e vet dhe ta ndalë zërin kritik”, deklaroi Shala në emisionin “Ditari”.
Ndërkaq, i pyetur se cili është bashkëpunimi i PSD-së me partitë tjera parlamentare opozitare, Shala tregoi se asnjëra nga partitë nuk ka pranuar ta krijojnë një front të përbashkët opozitar, duke lënë të nënkuptojë që mund të jenë të kompleksuara nga kryeministri i vendit, Albin Kurti, përcjell teve1.info.
“Ne u kemi bërë oferta partive opizitare për ta krijuar një front të përbashkët opozitar, meqë e keqja që po e sjell kjo Qeveri është shumë më e madhe, se sa e qeverive paraprake. Mirëpo, ato parti nuk kanë pranuar, ose janë të shantazhuara ose janë të kompleksuara nga Kurti. LDK-ja nuk është e gatshme”, theksoi më tej Shala në Tëvë1.
Sipas një komunikate për medie, dyshohet se përmes keqpërdorimit të detyrës zyrtare, lidhjes së kontratave të dëmshme dhe mashtrimit, të dyshuarit kanë keqpërdorur 120 milionë Euro./teve1.info/.
