Autoritetet njoftuan se gjashtë persona janë arrestuar pas raportimeve për vandalizëm dhe grabitje në Nantes, në Francën perëndimore.
Prefektura e rajonit Pays de la Loire dhe departamentit Loire-Atlantique u kishte bërë më parë thirrje të fortë qytetarëve që të shmangin qendrën e qytetit për shkak të “tubimeve të paautorizuara”.
Gaz lotsjellës është përdorur në qytete të ndryshme në mbarë Francën, ndërsa protestat vazhdojnë. Në Lion, policia përdori gaz lotsjellës për të shpërndarë turmat, ndërsa pamjet nga protestat në Marsejë tregojnë gjithashtu përdorimin e gazit lotsjellës kundër protestuesve.
“Rreth 150 prej nesh u mblodhën kryesisht nxënës të shkollave të mesme dhe studentë universitarë. Më pas, pothuajse menjëherë, u përdor gaz lotsjellës. Në rrugë mezi shihej gjë”, tha një nga protestuesit në Lion.
Gazeta franceze Le Parisien raportoi se policia po përdor topa uji, ndërsa ka njoftime edhe për përdorimin e gazit lotsjellës në Nicë.
Sipas një raporti nga kanali televiziv francez France 3, policia përdori gaz lotsjellës edhe kundër disa qindra protestuesve në Clermont-Ferrand.
Policia në Bordo, në Francën jugore, njoftoi se disa protestues po hedhin objekte ndaj efektivëve, po sulmojnë forcat e rendit dhe po ngrenë barrikada në sheshin Place de la Bourse.
Ata u kanë bërë thirrje qytetarëve që ta shmangin atë zonë. Në pamjet e publikuara nga prefektura, shihen individë të veshur me rroba të errëta dhe me fytyra të mbuluara, të cilët heqin dërrasa nga një ndërtesë dhe i vendosin ato përgjatë rrugës për të krijuar një barrikadë.
