Protesta e studentëve dhe gjimnazistëve në Tiranë vijon e përshkallëzuar, me incidente të regjistruara në disa zona të kryeqytetit, ku janë bllokuar disa nga rrugët kryesore.
Një ndërtese të braktisur pranë Ministrisë së Arsimit në Tiranë i është vënë zjarri nga protestuesit, gjatë ditës së tretë të protestave studentore.
Pas përhapjes së flakëve, në vendngjarje kanë mbërritur forcat zjarrfikëse, të cilat kanë ndërhyrë për shuarjen e zjarrit dhe për të parandaluar përhapjen e tij drejt objekteve të tjera.
Ndërkohë, efektivët e policisë kanë ndërhyrë për të shpërndarë turmën e protestuesve nga zona, ndërsa vijonin operacionet për shuarjen e flakëve.
Dita e tretë e protestave në Tiranë është shoqëruar sërish me tensione dhe kaos. Protestuesit janë mbledhur në dy raste në rrugën e Durrësit, pranë Ministrisë së Arsimit, ku situata është përshkallëzuar.
Policia ka përdorur ujë me presion dhe gaz lotsjellës për shpërndarjen e turmës, në përpjekje për të vënë situatën nën kontroll.
Ndërsa situata në kryeqytet vijon të jetë e tensionuar dhe protestuesit vazhdojnë të brohorasin “Rama jepe dorëheqjen, kryeministri i Shqipërisë Edi Rama në një prononcim për “Reuters” ka deklaruar se nuk do të japë dorëheqjen.
