Njohësit e çështjeve politike vlerësojnë se gjuha e përdorur nga kryeministres serbe, Ana Bërnabiq, në Këshillin e Sigurimit të OKB-së është e rrezikshme dhe luftënxitëse. Sipas tyre, në Kosovë nuk po kryhet spastrim etnik ndaj komunitetit serb, por se, këta të fundit po keqpërdoren nga Beogradi.
Në fjalimin e saj gjatë seancës së Këshillit të Sigurimit të OKB-së, kryeministrja e Serbisë, Ana Bërnabiq, akuzoi Kosovën për fushatë të spastrimit etnik të serbëve.
Një retorikë e tillë ishte përdorur edhe gjatë viteve të 90-ta nga politikanët serbë, në veçanti nga ish-presidenti serb, Sllobodan Millosheviq.
E deklaratat e kryeministres serbe i ka quajtur si të pavërteta politikani social-demokrat, Nenad Çanak.
Sipas tij, çfarë thotë Bërnabiq është e kundërta, sepse Beogradi po i përdor për interesa të veta komunitetin serb në Kosovë.
“Është e qartë se ka probleme që duhet të diskutohen, por është gjithashtu evidente se komuniteti serb në veri të Kosovës është përdorur për shumë vite si argument në politikën brenda Serbisë, pa marrë parasysh mirëqenien e tyre. Ajo që është e sigurt është se mbi ta nuk po kryhet asnjë “spastrim etnik”. Është e qartë se dështimi i kryengritjes së armatosur në Banjska (objektivat reale të së cilës mbeten të panjohura) ka nxitur retorikën nga Beogradi të përqendruar në dy pika kryesore: 1) Shteti i Serbisë nuk mori pjesë në atë që ndodhi në Banjska, 2) Gjithçka që ndodhi është rezultat i terrorit që Republika e Kosovës, e personifikuar me kryeministrin Albin Kurti, u bën serbëve të cilët nuk e duruan më”, deklaroi politikani social-demokrat, Nenad Çanak.
Kurse për profesorin, Abit Hoxha, fjalimi i kryeministres serbe, Ana Bërnabiq, dëshmon se regjimi aktual serb nuk është distancuar asnjëherë nga politikat nacionaliste të viteve 90-ta.
Tutje, Hoxha vlerëson se një retorikë e tillë lehtësisht mund të nxis edhe konflikte.
Tensionet mes Kosovës dhe Serbisë mbeten të larta pas sulmit terrorist ndaj policisë së Kosovës më 24 shtator, ku mbeti i vrarë rreshteri Afrim Bunjaku.
Në ditët në vijim pritet të mbahet edhe një takim tjetër i lartë në Bruksel mes dy delegacioneve.
