Për herë të fundit po vijnë në gjykatore.
Të premten u mbajt seanca e fjalëve përfundimtare ndaj të pandehurve Naim Murseli, Kushtrim Kokalla e Granit Plava.
Ndaj tyre, prokurorja e rastit po kërkon burgim të përjetshëm pasi thotë se provat kanë dëshmuar se në mënyrë të organizuar kanë vrarë ish-bashkëshorten e Murselit, Liridona Ademaj.
“Në muajin qershor të vitit 2022 familja Murseli ka paguar policën e sigurimit në emër të Lirdona Ademajt. Menjëherë pas kësaj për të cilën na ka dëshmuar edhe Kushtrim Kokalla, Naimi ka këkruar nga ai që ta gjejë mënyrën dhe t’a vrasë Liridonën që dmth me vetëdije është paguar polica e sigurimit jetësor për Liridonën… kemi pasur mundësi ti shohim “tri skenar të ndryshem të një ngjarjeje” të cilat janë dhënë nga tre të akuzuarit në të cilat mundet e të cilave do tu kishin zili edhe producentët dhe skenaristët e Hollyëood. Ku secili nga tre të akuzuarit vetën e ka paraqitur si person që nuk ka asgjë me kryerjen e veprës penale që është lëndë e kësaj procedure duke ja gjuajtur fajësinë të akuzuarve të tjerë e që mëkati më i madh i tij është njohja e dy të akuzuarve të tjerë”, tha prokurorja Javorka Perlinçeviq.
Kërkesë të njëjtë për trupin gjykues patën edhe vëllai i të ndjerës dhe avokati, Leutrim Syla.
“Në këtë ditë kur flasim, të gjithë ne që e kemi përcjellë këtë proces dhe të gjithë shqiptarët kudo që janë, një gjë e kanë të qartë: se Naimi e ka organizuar këtë vrasje së bashku me Kushtrimin, duke e zgjedhur Granitin si vrasës. Ne kemi parë dhe dëgjuar shumë gjëra këtu, kemi qenë prezent të gjithë, por së paku 22 kamera i lidhin Naimin, Granitin dhe Kushtrimin”, deklaroi vëllau i Liridonës, Leonard Ademaj.
“Afërsia e tyre është aq e tillë që edhe nga vet bisedat e tyre në telefon vërehet afërsia mes tyre ku Naim Murseli i thotë Granit Plavës në lidhje me Kushtrim Kokallën me nofkën ‘Kuça’ kur i thotë që kjo punë kryhet nesër sigurt, atë tregoi Kuça? Pra ka pasur asi afërsie sa që kanë komunikuar me emra e nofka”, tha mbrojtësi i viktimës, Leutrim Syla.
E në fjalën përfundimtare, Naim Murseli tha se nuk ka organizuar dhe kryer vrasjen e Liridonës.
“Ju betohem se Naim Murseli nuk ka qenë fare në veturë në momentin e vrasjes. Ju betohem që Naim Murseli nuk ka paguar për vrasjen. Unë pa të drejtë jam akuzuar nga media, nga kjo sallë, por e vërteta është krejtësisht ndryshe”, tha i akuzuari Naim Murselaj.
Edhe mbrojtësi i tij, kundërshtoi disa nga provat që janë paraqitur nga Prokuroria, duke thënë se nuk janë marrë parasysh kërkesat e tyre.
“Gjykata duhet tash dikujt me i besu, ne nuk po themi që Liridona nuk është privuar nga jeta ajo nuk është kontestuese, veç ndonjë budalla ndonjë i çmendur thotë që s’u privu nga jeta, mirëpo gjyqi duhet me vërtetu në çfarë rrethana”, tha avokati i Murselit, Shemsedin Pira.
Edhe mbrojtësit e dy të pandehurve, Plava e Kokalla thanë se nuk është arritur të provohet fajësia e tyre.
Shpallja e aktgjykimit ndaj tyre pritet të bëhet të martën, më 21 prill në orën 13:30.
