Prokuroria Themelore në Prishtinë ka autorizuar Inspektoratin Policor të Kosovës (IPK) që të hetojë veprimet e ndërmarra nga zyrtarët policorë gjatë protestave të zhvilluara një ditë më parë në Prishtinë.
Sipas Prokurorisë, hetuesit e IPK-së do të ndërmarrin veprimet e nevojshme për trajtimin e secilit rast që lidhet me ngjarjet e zhvilluara në hapësirat përreth objekteve të Qeverisë dhe Kuvendit të Republikës së Kosovës.
Qëllimi i autorizimit është grumbullimi i informatave dhe provave relevante lidhur me dyshimet për tejkalim eventual të autorizimeve policore gjatë përdorimit të forcës për shpërndarjen e protestuesve.
“Prokuroria Themelore në Prishtinë, në bashkëpunim dhe koordinim të veprimeve me IPK-në, do të ndërmarrë të gjitha masat e nevojshme ligjore me qëllim të ndriçimit të secilit rast ku dyshohet të jetë përdorur forcë përtej nevojës dhe autorizimeve që burojnë nga legjislacioni në fuqi”, thuhet në njoftim.
Prokuroria ka bërë të ditur se do të ndërmerren të gjitha veprimet hetimore për të sqaruar rrethanat e krijuara gjatë protestave dhe për të përcaktuar nëse në ndonjë rast ka pasur përdorim të forcës përtej autorizimeve ligjore.
Hetimet do të zhvillohen në bashkëpunim dhe koordinim me Inspektoratin Policor të Kosovës.
