Zyra e Kryeprokurorit të Shtetit ka njoftuar se ka përfunduar të gjitha përgatitjet për mbrojtjen e votës së lirë të qytetarëve dhe garantimin e integritetit të procesit zgjedhor në zgjedhjet e parakohshme për Kuvendin e Kosovës, të cilat do të mbahen më 7 qershor.
Sipas njoftimit, në mbarëvajtjen e procesit zgjedhor do të angazhohen mbi 100 prokurorë dhe zyrtarë të sistemit prokurorial.
Ata do të jenë në detyrë në të gjithë territorin e vendit deri në përfundimin e procesit të votimit dhe numërimit, me qëllim të trajtimit të menjëhershëm të çdo parregullsie të mundshme.
Prokuroria e Shtetit ka bërë thirrje që qytetarët, subjektet politike, institucionet dhe organizatat e ndryshme të raportojnë çdo rast për të cilin dyshojnë se përfshin keqpërdorim, manipulim apo cenim të votës./teve1.info/
