Një ngjarje e rëndë ka ndodhur mbrëmë pas mesnatës në qytetin e Prizrenit, ku një burrë ka therur me thikë gruan dhe vajzën e tij të mitur. Të dyja viktimat janë në gjendje të rëndë shëndetësore dhe ndodhen në trajtim mjekësor në Spitalin Rajonal të Prizrenit.
Sipas njoftimit të Prokurorisë Themelore në Prizren, gruaja është gjetur e gjakosur në rrugë, ndërsa vajza e mitur është gjetur në katin e fundit të ndërtesës ku ndodhi rasti.
“Patrulla policore iu është përgjigjur menjëherë thirrjes dhe me të arritur në vendin e ngjarjes, ka hasur një person të gjinisë femërore (bashkëshortja e të pandehurit) e cila ndodhej në rrugë me lëndime trupore dhe gjakderdhje të shkaktuara me mjet të mprehtë – thikë. Viktimës i është ofruar ndihma e parë nga zyrtarët policorë deri në ardhjen e ekipit të emergjencës mjekësore,” thuhet në njoftimin e Prokurorisë.
Tutje, bëhet e ditur se edhe vajza e mitur u gjet në gjendje të rëndë në katin e fundit të objektit banesor.
“Po ashtu, në katin e fundit të ndërtesës është gjetur edhe viktima e dytë, vajza e mitur. Ajo po ashtu kishte lëndime trupore dhe gjakderdhje. Viktimës së mitur i është ofruar ndihma e parë dhe më pas, bashkë me nënën e saj, janë dërguar për trajtim në Spitalin Rajonal të Prizrenit. Sipas mjekëve, gjendja shëndetësore e të dy viktimave është e rëndë,” thuhet më tej në njoftim.
Autori i dyshuar i këtij krimi është arrestuar në hyrje të banesës dhe është shoqëruar në stacionin policor për procedura të mëtejme.
“Prokurori kujdestar ka lëshuar aktvendim për ndalimin e të pandehurit në kohëzgjatje prej 48 orëve, për shkak të dyshimit të bazuar se i njëjti ka kryer veprat penale ‘Vrasja e rëndë në tentativë’ dhe ‘Mbajtja në pronësi, kontroll ose posedim të paautorizuar të armëve’,” përfundon njoftimi i Prokurorisë.
Hetimet mbi motivet e sulmit dhe rrethanat e plota të ngjarjes janë duke vazhduar.
