Sigal Prishtina dhe Peja do të luajnë sot ndeshje në kuadër të “Final 4” të Ligës Ballkanike por me synime të ndryshme.
Përderisa Prishtina kërkon titullin e kampionit, skuadra e Pejës synon vendin e tretë në këtë garë. Për vendin e tretë, Peja do të përballet me Lovqenin, ndeshje kjo që ka nisur në orën 17:00 dhe luhet në Qipro.
Si Peja ashtu edhe Lovqeni pësuan të premten në kuadër të gjysmëfinaleve nga AEL-i përkatësisht Sigal Prishtina.
Ndërkohë, prej orës 19:30 në finalen e garës përfundimtare të BIBL-it, do të përballen Prishtina me AEL-in.
Këto dy skuadra janë përballur dy herë në stinorin e rregullt, ku Prishtina në të dyja ndeshjet ka shënuar fitore. Po ashtu, Prishtina synon ta fitoj për herën e tretë titullin e kampionit në BIBL pas sukseseve në vitin 2014 dhe 2015. Prishtina në këtë finale mund të llogarit edhe në kapitenin Dardan Berisha dhe amerikanin Derrick Wilson, të cilët janë rikuperuar plotësisht nga lëndimi.
Në stinorin e rregullt të këtij edicioni në BIBL janë paraqitur vetëm pesë skuadra.
