Zëri që dëgjohet, është i komandantit legjendar, Adem Jashari.
Këto fjalë, kryekomandanti i UÇK-se, i tha plot tri dekada më parë.
E në vizualimin e zërit, kjo porosi duket në këtë mënyrë.
Kjo u bë edhe inspirim për formën e projektit fitues për memorialin “Adem Jashari” në Prishtinë.
E të hënën, u bë e ditur se ku do të vendoset memoriali “Zani i Lirisë”.
Kryetari i Prishtinës, Përparim Rama, në një konferencë për media, zbuloi se lokacioni do të jetë mes ndërtesës së Kuvendit të Kosovës dhe Xhamisë së Gurit.
Por, aktualisht, këtu shtrihet rruga “Agim Ramadani”, në të cilën vazhdojnë të qarkullojnë normalisht veturat.
Pavarësisht që sheshi që e prezantoi Rama nuk ekziston, shpallja e projektit fitues i gëzoi veteranet e luftës.
“Për mosmarrëveshjet eventuale që i kanë Ministria e Kulturës dhe Komuna, ne nuk e dijmë se a është zgjedhur ai problem ose jo. Po unë mendoj se në qoftë se fituesi i projektit është shpall po besoj që është zgjidh edhe ai problem dhe mos të shkaktohet më problem sa i përket realizimit të këtij projektit”, ka thënë Sopi.
Veteranët besojnë se komuna e përzgjodhi projektin më të mirë.
Shkak për këtë është edhe vet profesioni i kryetarit të kryeqytetit.
“Kryetari vet është arkitekt dhe jam i bindur se nuk do t’ia huq me përzgjedhjen e një projekti të mirë për një figurë emblematike siç është figura e komandantit legjendar Adem Jashari”, u shpreh tutje Sopi.
Tëvë1 ka provuar të marrë edhe qëndrimet e opozitarëve në Komunën e Prishtinës, por të njëjtit nuk kanë pranuar të flasin.
Ndryshe, konkursi për memorialin “Adem Jashari” ishte shpallur katër muaj më parë me një buxhet të parashikuar prej 150 mijë eurosh.
Ndërsa kur pritet të përfundojë ky projekt, nga Komuna e Prishtinës të martën nuk dhanë detaje.
