Kryetari i Prishtinës, Përparim Rama ka deklaruar se miratimi unanim në Komisionin për Buxhet dhe Financa për përfshirjen e buxhetit të Kryeqytetit në projekt-buxhetin e vitit 2026 është një hap i rëndësishëm për Prishtinën dhe për qytetarët e kryeqytetit.
Sipas tij, vendimi i marrë me 10 vota për, pa asnjë votë kundër apo abstenim, siguron stabilitet financiar dhe krijon bazë të qëndrueshme për realizimin e projekteve zhvillimore që komuna I ka planifikuar për vitin e ardhshëm.
“Kjo na mundëson të vazhdojmë investimet në infrastrukturë, shërbime publike dhe projekte strategjike që përmirësojnë cilësinë e jetës në Kryeqytet. Procesi është përmbyllur nga Komuna e Prishtinës me përkushtim dhe profesionalizëm, duke përgatitur të gjitha dokumentet dhe tabelat e nevojshme në përputhje me kërkesat ligjore”, ka shkruar Rama në Facebook.
Ai ka theksuar se Prishtina do të vazhdojë të punojë me përgjegjësi, transparencë dhe vizion të qartë zhvillimor, duke u siguruar që çdo mjet buxhetor të kthehet në investim konkret për qytetarët.
Ndryshe, Komisioni për Buxhet e ka aprovuar kërkesën e Komunës së Prishtinës që buxheti i aprovuar nga Kuvendi Komunal i Prishtinës të përfshihet në buxhetin për vitin 2026./teve1.info/
