Pas deklaratës së shefes së shtetit, Vjosa Osmani se Kosova duhet të ulet së bashku me SHBA-në dhe të hartojnë statutin e asociacionit të komunave me shumicë serbe, Kryeministri Albin Kurti ende nuk është deklaruar. Megjithatë heshtja e tij po konsiderohet se gjithçka po shkon në një koordinim të mirëfilltë.
Nisja e procedurave për formimin e asociacionit të komunave me shumicë serbe në Kosovë përherë ka qenë kërkesë e aleatëve ndërkombëtarë.
Së fundmi këtë kërkesë si nevojë urgjente e përmendi edhe një herë ambasadori amerikan në Prishtinë, Jeffery Hovenier.
Madje sipas këtij të fundit, Shtetet e Bashkuara janë të gatshme ta këshillojnë Kosovën, në hartimin e statutit të këtij asociacioni, pas deklaratës së presidentes Vjosa Osmani, se vendi duhet ta përgatisë këtë draft bashkë më SHBA-në.
Megjithëse nuk ka pasur reagim të kryeministrit Albin Kurti në lidhje me deklaratat e Vjosa Osmanit, njohësi i çështjeve politike, Tomorr Avdija konsideron se dy krerët shtetërorë janë në një linjë.
“Kjo çështje duket se ka një koordinim të heshtur mes kryeministrit Kurti dhe presidentes Osmani. Ky koordinim duket që ka shkuar shumë mirë deri në këtë fazë dhe çështjet janë duke u diskutuar edhe në detaje për të pasur një finalizim të një dokumenti i cili mund të jetë gati para fundit të këtij viti”, është shprehur njohësi i çështjeve politike, Tomorr Avdija.
Mirëpo, në situatën që momentalisht ndodhet Kosova, profesori universitar, Seb Bytyçi vlerëson se është herët që të zhvillohen diskutime mbi këtë çështje.
“Pas sulmit të 24 shtatorit është ende shumë herët të flitet për asociacionin. Edhe në marrëveshjen Bruksel – Ohër bëhet fjalë për vetmenaxhim dhe nuk bëhet fjalë për asociacion……. Nëse formohet asociacioni duhet të jetë i kufizuar. Pra është ende shumë herët të flitet për asociacionin por edhe nëse formohet nuk do të jetë ndryshe nga Asociacioni i Komunave të Kosovës”, ka thënë profesori universitar, Seb Bytyqi.
Asociacioni është në mesin e marrëveshjeve që Kosova dhe Serbia kanë arritur në dialogun e ndërmjetësuar nga Unioni Evropian.
