Thirrja për protestë u bë për orën 12:00.
I pari që mbërriti në sheshin “Skënderbeu”, ishte vetë organizatori Durim Aliu.
Ky i fundit kërkoi dorëheqjen e kryeministrit të Kosovës, Albin Kurti.
Por, thirrjes për protestë iu përgjigjën një numër relativisht i vogël i qytetarëve.
“Ne e dimë që shumica nuk guxojnë të dalin këtu për arsye se e rrezikojnë vendin e tyre të punës. Ne e dimë që ky regjim i Albin Kurtit nuk e ka shumë larg me ecë prej këtu. Nuk do të ndalemi me protesta, do ta mbushim sheshim me qytetarë”, u shpreh Aliu.
Në mesin e atyre që morën fjalën ishin edhe studentët.
“Sot nuk kemi ardhur këtu për t’iu dëgjuar, por kemi ardhur që t’iu kërkojmë llogari! Le të flasim pak për arsimin. Rezultatet e PISA tregojnë që arsimi në Kosovë është pranë fundit. Po ashtu, studentët po përballen me kushte të vështira, bursa të pamjaftueshme, mungesë të praktikës profesionale dhe kushte për punësim. Na flisni për ardhmen e Kosovës, por çfarë të ardhme po na afroni? Diplomë pa perspektivë dhe vite studimi pa garanci për punë. Dhe pastaj po çuditeni pse po ikin të rinjtë”, tha studenti Princ Zogaj.
Këta thonë që qytetarët po detyrohen të largohen nga vendi për shkak të qeverisjes.
“Po e shohim çdo ditë se si jeta në Kosovë po shkon drejt degradimit, dështimit dhe humbjes së shpresës. Që prej qershorit të vitit 1999 e deri më sot, Kosova nuk e ka përjetuar ndonjëherë qeverinë më të keqe, më të dobët, më të dështuar në çdo sferë të qytetarit të Kosovës. Pra, Kosova nuk është mirë. Rinia po ikën, papunësia është në nivelin më të ulët, kurse pagat nuk po japin asnjë efekt pozitiv përballë çmimeve kaq të larta”, tha Adrian Mustafa-student.
Dikush tjetër ngriti shqetësime edhe për gjendjen në sektorin publik.
“Te na vdesë një i moshuar në banesë dhe ta gjejnë pas katër dite sepse nuk ka mbikëqyrje të shtetit, te na vdesë nëna nga kanceri sepse nuk ka medikamente, të paguhen pagesat e serbëve pa punuar në qeveri, kurse shtesat e ushtarëve të FSK-së, mos të paguhen as ndërrimin e natës, t’i shohim ushtarët duke punuar taksi dhe duke punuar kamarier, t’i shohim policë që punojnë në klubet e natës. Është kjo interes? Dhe shihjau uniformën, nuk janë këta të dy paviona policia, ose dy regjimentet, por janë disa të shlyera që shtatë vite nuk kanë marrë uniformë. Këpucët e tyre nuk janë të njëjta, sepse disa janë blerë në shitoret 5 euro dhe në pazare dhe nuk janë të shtetit, dhe disa nuk mund t’ia dalin fundmujit”, u shpreh ekonomisti Adem Qorrolli.
Organizatori i protestës tha që protesta do të vazhdojë të martën në ora 16:00.
