Presidentja e vendit, Vjosa Osmani ka udhëtuar për vizitë zyrtare njëditore në Rejkjavik të Islandës.
Sipas njoftimit të Presidencës, Osmani do të takohet me homologun e saj, presidentin Guðni Th. Jóhannesson, kryeministren Katrín Jakobsdóttir, kryetarin e Kuvendit Birgir Ármannsson dhe ministren e Punëve të Jashtme Thórdís Kolbrún Reykfjörd Gylfadóttir.
Gjatë kësaj vizite, temë diskutimi ndër të tjerash do të jetë bashkëpunimi përgjatë presidencës islandeze të Këshillit të Evropës për të shtyrë para anëtarësimin e Kosovës në këtë organizatë.
“Kjo është vizita e parë dypalëshe e një presidenti të Kosovës në historinë e raporteve në mes Islandës dhe vendit tonë. Në këtë vizitë pune njëditore, temat e diskutimit të Presidentes do të jenë intensifikimi i bashkëpunimit përgjatë presidencës islandeze të Këshillit të Evropës për të shtyrë përpara anëtarësimin e Republikës së Kosovës në këtë organizatë, thellimi i marrëdhënieve bilaterale me Islandën, avancimi i rrugës euroatlantike të Kosovës, si dhe çështje të tjera të interesit të përbashkët”, bëhet e ditur në njoftim. /Teve1.info/
