Vetëm pak orë i janë dashur Presidentes Vjosa Osmani, që t’i përgjigjet letrës së kryesuesit të seancës konstituive, Avni Dehari, e cila zgjidhi një situatë që kishte rrezik të shkaktonte ngërç politik.
Në letrën e presidentes thuhet se seanca duhet të vazhdojë brenda 48 orëve nga ndërprerja e saj.
“Funksionalizimi i institucioneve të dala nga vullneti i qytetarëve është obligim kushtetues i çdo institucioni dhe çdo personi të mveshur me autoritet publik. Në rastin konkret, ky është obligim i juaji si kryesues i seancës konstituive si dhe i të gjithë deputetëve të zgjedhur në Legjislaturën e Nëntë të Kuvendit. Rrjedhimisht, gjithashtu ju rikujtoj se fryma e Kushtetutës, praktika gjyqësore e Gjykatës Kushtetuese dhe Rregullorja e Kuvendit të Kosovës, ju obligon që seancën konstituive ta vazhdoni jo më vonë se brenda dyzet e tetë orëve nga ndërprerja e saj”, thuhet në letrën e Presidentes.
Në letër, Osmani ka theksuar edhe dy aktgjykime të Gjykatës Kushtetuese.
E menjëherë pas pranimit të saj, kryesuesi Dehari e ka thirrur seancën për ditën e enjte, në ora 12:00.
“Nuk ka pasur fare nevojë që t’i dërgohet letër Presidentes. Kryesuesi Avni Dehari do të duhej t’i kishte të qarta kompetencat e tij në administrimit e seancës konstituive të Kuvendit. Këto janë të qarta në rregulloren e Kuvendit”, ka thënë Vullnet Bugaqku nga KDI.
Gjatë ditës, kryetari i Lidhjes Demokratike, Lumir Abdixhiku, e ka konfirmuar pjesëmarrjen në këtë seancë.
Të pranishëm do të jenë edhe partitë e tjera parlamentare.
Seanca e e parë dështoi që në pikën e parë të rendit të ditës, pasi nuk kaloi verifikimi i mandateve.
