Presidenti i Këshillit Evropian paralajmëroi të martën se zhvillimet në Bregun Perëndimor të pushtuar, të tilla si “aneksimi de facto”, po rrezikojnë perspektivat për një zgjidhje me dy shtete.
“Në Bregun Perëndimor, përfshirë Jerusalemin Lindor, zgjidhja me dy shtete po rrezikohet çdo ditë”, tha Antonio Costa gjatë një eventi të nivelit të lartë mbi zgjidhjen me dy shtete dhe planin gjithëpërfshirës të paqes për Gazën, në margjinat e Asamblesë së 81-të të Përgjithshme të OKB-së, shkruan Anadolu.
“Ne i shohim imazhet dhe dëgjojmë dëshmitë e asaj që po ndodh çdo ditë në Bregun Perëndimor – dhuna e kolonëve, pandëshkueshmëria, zhvendosja e komuniteteve të tëra dhe aneksimi de facto. Këto vendbanime janë të paligjshme sipas ligjit ndërkombëtar”, tha ai, duke shtuar se nevojitet veprim urgjent për të ruajtur zgjidhjen me dy shtete dhe rrugën drejt paqes.
Costa bëri thirrje gjithashtu për legjitimitet të ripërtërirë për Autoritetin Palestinez përmes zgjedhjeve, duke thënë se Bashkimi Evropian i mbështet fuqimisht zgjedhje të tilla dhe i bën thirrje Izraelit t’i lehtësojë ato.
Ai tha se bashkësia ndërkombëtare, së bashku me Autoritetin Palestinez, duhet t’i japin brezit të ri “shpresë të ripërtërirë për një të ardhme të ndryshme”.
“Nevojitet veprim për të ruajtur zgjidhjen me dy shtete dhe rrugën drejt paqes”, tha Costa.
