Presidenca e Kosovës ka reaguar lidhur me vendimin e Këshillit të BE-së që serbëve të Kosovës tu lejohet lëvizja e lirë në zonën schengen me pasaporta të Serbisë.
Nga Presidenca kanë thënë se ky vendim mbështet strukturat ilegale të Serbisë në Kosovë.
“Për më tepër, vendimi i BE-së mbështet strukturat dhe prezencën ilegale të Serbisë në Kosovë dhe bie në kundërshtim me Kushtetutën dhe ligjet e Kosovës, si dhe me standardet e vetë BE-së në fushën e sundimit të ligjit. Kosova për këtë vendim nuk është konsultuar fare, megjithëse institucionet tona i kanë dërguar vazhdimisht argumentet tona pse ky vendim është i dëmshëm. Ky vendim i BE-së, ligjërisht është i pazbatueshëm në Kosovë, ndaj pasojat e tij nuk mund t’i marrë Kosova dhe institucionet e saj, sikurse as përgjegjësinë juridike dhe atë politike”, thuhhet nga Presidenca në një përgjigje për teve1.info.
Sipas Presidencës, ky vendim ndikon negativisht në integrimin e qytetarëve serb, në një kohë kur numri i tyre që pajisen me pasaporta të Kosovës është në rritje.
“Legjitimimi i këtyre pasaportave të jashtëligjshme nga BE-ja, saboton procesin e integrimit të komunitetit serb në Kosovë, e në veçanti në një periudhë kur një numër i madh i qytetarëve të etnisë serbe në Kosovë po pajiseshin me pasaporta të Republikës së Kosovës. Gjithashtu, ky vendim ndikon negativisht në shtrirjen e sundimit të ligjit në gjithë Kosovën dhe për të gjithë qytetarët e saj. Për më tepër, këto dokumente që përmbajnë informacione të paverifikuara, mund të barten nga persona që mund të cenojnë drejtpërdrejt rendin dhe sigurinë edhe në BE”, thuhet tutje.
“Republika e Kosovës nuk merr asnjë përgjegjësi për shkeljet që bartësit e këtyre dokumenteve të jashtëligjshme mund të bëjnë në zonën Schengen”.
Këtë vendim e ka kundërshtuar edhe Qeveria e Kosovës.
Ndërsa, nga opozita kanë fajësuar Qeverinë e Kosovës për dështim diplomatik.
