Marko Aranutovic ishte një nga goditjet e minutave të fundit për Interin në merkato. Zikaltërit kërkonin me ngulm një opsion ekstra në sulm dhe 34-vjeçari plotësonte të gjitha kriteret. Megjithatë, historia e austriakut mund të kishte marrë një tjetër rrjedhë nëse Bologna, klubi që e kishte në pronësi, nuk do të kishte refuzuar ofertën nga Roma me trajnerin Jose Mourinho që gjithashtu kërkonte shërbimet e Arnautovic. Është agjenti dhe vëllai i lojtarit, Daniel ai që tregon prapaskenat e merkatos.
“Ne kishim folur me dy klube italiane për Arnautovic, por asnjë nga ato nuk ishte Inter. Bologna kishte refuzuar Romën dhe dukej se Arnautovic do të qëndronte te Bologna. Më pas mendova që Interit i duhej një sulmues dhe i dërgova një mesazh Ausilios (drejtori i Inter), por nuk u përgjigj. Në fund u detyrova ta telefonoja dhe zgjidhëm gjithçka, Bologna pranoi ofertën dhe Arnautovic tashmë luan për Inter”, u shpreh Daniel.
