Shoqata e të Drejtave të Pacientëve (PRAK) ka reaguar pas vendimit për ndalimin e operacioneve – programit të ftohtë gjatë muajve te verës në Spitalin Rajonal të Gjakovës, për shkak të “temperaturave të larta, pushimeve vjetore dhe mungesës së kushteve optimale për punë”.
PRAK tha se për këtë çështje ka dërguar pyetje te Zyra ligjore e Ministgrisë së Shëndetësisë, e cila i ka thënë se ndërprerja e operacioneve gjatë verës është e kundërligjshme.
“LIGJI Nr. 04/L-125 PËR SHËNDETËSI në nenin 9 ka përcaktuar funksionet udhëheqëse dhe rregullatore të Ministrisë duke përfshirë përcjelljen e situatës dhe zbatimin e masave adekuate për parandalimin, identifikimin dhe zgjidhjen e problemeve në sektorin e shëndetësisë;
Ҫdo vendim i Institucionit shëndetësor (Spitalit publik) duhet të koordinohet dhe shqyrtohet nga Bordi drejtues i SHSKUK-së i cili sipas nenit 64 të ligjit për shëndetësi është organi më i lartë vendim-marrës i SHSKUK-së”, thuhet në përgjigjen e Zyrës ligjore për Shoqatën e të Drejtave të Pacientëve.
PRAK kërkon nga Spitali i Përgjithshëm i Gjakovës që pa vonesë ta anuloj këtë vendim.
“Gjithashtu kërkojmë nga Ministria e Shëndetësisë dhe menaxhmenti i SHSKUK – së të marr masa të menjëhershme ndaj kujtdo që e sfidon legjislacionin në fuqi në dëm të pacientëve, siç është rasti në fjalë”, thuhet nga PRAK.
